பந்தலூர்: பந்தலூர் நத்தம் பகுதியில் குண்டும் குழியுமான சாலை பாதிக்கப்பட்டுள்ளது. நீலகிரி மாவட்டம், பழைய தியேட்டர் அருகே உள்ள நத்தம் பகுதியில் ஏராளமான குடும்பத்தினர் வசித்து வருகின்றனர்.
இந்த தாழ்வான பகுதிக்கு பல ஆண்டுகளுக்கு முன் நெல்லியாளம் நகராட்சியால் நடைபாதை அமைக்கப்பட்டது.
இந்த கான்கிரீட் நடைபாதை தற்போது சிதிலமடைந்து குண்டும், குழியுமாக இருப்பதால் மக்கள் பயன்படுத்த முடியாத நிலை உள்ளது.
மேலும், குடியிருப்புகளில் இருந்து வெளியேறும் கழிவுநீர், நடைபாதையில் செல்வதால், மாற்றுத்திறனாளிகள், முதியவர்கள், கர்ப்பிணிகள் நடைபாதையில் நடக்க முடியாமல் அவதிப்படுகின்றனர்.
சிதிலமடைந்து குண்டும், குழியுமாக உள்ள நடைபாதையை சீரமைக்க பலமுறை நகராட்சியிடம் கோரிக்கை விடுத்தும் இதுவரை நடவடிக்கை எடுக்காததால் அப்பகுதி மக்கள் அதிருப்தியில் உள்ளனர்.
எனவே, நெல்லியாளம் நகராட்சி நிர்வாகம் நடைபாதையை சீரமைக்க நடவடிக்கை எடுக்க வேண்டும் என்பதே அப்பகுதி மக்களின் எதிர்பார்ப்பாக உள்ளது.
