மதுரை: ஆர்எஸ்எஸ் தமிழ்நாட்டில் வளர்வதற்கு அதிமுக வாய்ப்பளித்தால் அது மக்களுக்கு துரோகம் என விசிக தலைவர் திருமாவளவன் கூறியிருந்தார். இதற்கு பதிலளித்த அதிமுக முன்னாள் அமைச்சர் செல்லூர் ராஜு, “எங்களுக்கென்று கொள்கை உண்டு, யாருக்கும் அடிமை இல்லை” எனத் தெரிவித்தார். இந்த கருத்து அரசியல் வட்டாரத்தில் பெரிய விவாதத்தை ஏற்படுத்தியுள்ளது.
2026 சட்டமன்றத் தேர்தலை முன்னிட்டு அதிமுக-பாஜக கூட்டணி அமைந்துள்ள நிலையில், எதிர்க்கட்சிகள் ஆர்எஸ்எஸ் அதிமுகவை வழிநடத்துவதாக குற்றம் சாட்டுகின்றன. இதற்கு பதிலளித்த மத்திய இணையமைச்சர் எல்.முருகன், “ஆர்எஸ்எஸ் வழிநடத்தினால் தவறு என்ன?” எனக் கேட்டிருந்தார். இந்த பேச்சு அதிமுக தொண்டர்களிடையே அதிருப்தியை ஏற்படுத்திய நிலையில், செல்லூர் ராஜுவின் பதிலடி முக்கியத்துவம் பெற்றுள்ளது.
திருமாவளவன், “பெரியார் பாசறையில் வளர்ந்த அதிமுக, இன்று ஆர்எஸ்எஸ் அமைப்புகளுக்கு கம்பளம் விரித்து வரவேற்பு கொடுக்கிறது” எனக் கடுமையாக விமர்சித்தார். இதற்கு எதிராக பேசும் செல்லூர் ராஜு, “எங்களுக்கு யாரும் எஜமானர்கள் இல்லை, யாருக்கும் நாங்கள் அடிமை இல்லை. அதிமுக எப்போதும் தனது கொள்கையில் நிலைத்து நிற்கும்” என்றார். மேலும், “திமுக அமைச்சர்கள் மதுரைக்கு என்ன செய்து வைத்தார்கள்? அவர்களுடைய ஆட்சியில் மக்களுக்கு பலன் என்ன கிடைத்தது?” என்றும் கேள்வி எழுப்பினார்.
அவர் மேலும், “நாங்கள் எப்போதும் ஜெயலலிதா, எடப்பாடி பழனிசாமி காட்டிய வழியில் செல்கிறோம். எங்கள் அரசியல் அடையாளத்தை எவரும் மாற்ற முடியாது” என வலியுறுத்தினார். அரசியல் சூழலில் இந்த கருத்துகள் அதிமுக-பாஜக கூட்டணிக்குள் ஏற்படும் சலசலப்பை அதிகரிக்கும் விதமாக உள்ளது. வரவிருக்கும் தேர்தலை முன்னிட்டு, இந்த விவாதம் இன்னும் பல கட்டங்களில் தீவிரமடையும் என எதிர்பார்க்கப்படுகிறது.
