தஞ்சாவூர்: தஞ்சை அருகே வல்லம் பிரிஸ்ட் பல்கலைக்கழகத்தின் வேளாண்மைத்துறை சார்பில் விவசாயிகளுக்கு ட்ரோன் வழிநடத்தும் விவசாயம் என்ற தலைப்பில் ஒருநாள் பயிற்சி முகாம் நடந்தது.
இன்றைய காலக்கட்டத்தில் விவசாயப்பணிக்கு ஆட்கள் கிடைப்பது மிகவும் சிரமமான ஒன்றாக உள்ளது. முக்கியமாக உரம் தெளித்தல் பணிக்காக விவசாயிகள் மிகுந்த அவதிப்படுகின்றனர். இதற்கு தீர்வாக நவீன காலமான தற்போது ட்ரோன் வாயிலாக விவசாயப்பணிகள் மேற்கொள்வதால் கிடைக்கும் நன்மைகள் குறித்து இந்த பயிற்சி முகாம் நடத்தப்பட்டது.
முகாமிற்கு பல்கலைக்கழக வேந்தர் நாகேஸ்வரன் தலைமை வகித்து தொடக்கி வைத்தார். தலைமை செயல் அதிகாரி முனைவர் டாக்டர்.வெங்கட ஹர்த்தன ரெட்டி, பல்கலைக்கழக துணைவேந்தர் முனைவர் டாக்டர். கிறிஸ்டி, பதிவாளர் முனைவர் அப்துல்கனிகான் ஆகியோர் ட்ரோன் செயல்பாட்டால் விவசாயிகளுக்கு நேரம் மற்றும் பண விரயம் தடுக்கப்படுவது குறித்தும், வேளாண் கல்வி மற்றும் புதிய தொழில்நுட்பங்களில் பல்கலைக்கழகத்தின் பங்கு மற்றும் புதுமையான திட்டங்களின் மூலம் வேளாண்மை மாணவர்களுக்கு பிரிஸ்ட் பல்கலைக்கழகம் ஆதரவளிக்கும் உறுதிப்பாடு குறித்து விளக்கி பேசினர்.
விவசாய ட்ரோன் நிபுணர் அரவிந்தன் துல்லியமான விவசாய நுட்பங்கள் தொடர்பாகவும், ட்ரோன்கள் வாயிலாக பூச்சி மருந்து அடிப்பதால் குறைவான நேரத்தில் அதிக பரப்பளவில் தெளிக்க முடியும் என்பது குறித்து விளக்கி பேசினார்.
இந்த பயிற்சியில் துல்லிய வேளாண்மை, பயிர் கண்காணிப்பு, பூச்சிக்கொல்லி தெளிப்பு, மண்ணியல் பகுப்பாய்வு போன்ற முக்கிய பயிற்சிகள் விவசாயிகள், அறிவியல் அறிஞர்கள், மாணவர்கள் மற்றும் வேளாண் நிபுணர்களுக்கு வழங்கப்பட்டது. மேலும் ட்ரோன் வாயிலாக எப்படி விவசாயப்பணிகளை மேற்கொள்ள இயலும் என்று செயல்முறை விளக்கம் செய்து காட்டப்பட்டது.
பயிலரங்கத்தின் ஒருங்கிணைப்பாளர் முனைவர் டாக்டர் அருண்குமார், ட்ரோன் தொழில்நுட்பம் விவசாயத்திற்குத் தரும் பலன்கள், ட்ரோன்களின் நவீன பயன்பாடுகள் மற்றும் செலவு குறைக்கும் முறைகளை குறித்து விளக்கம் அளித்தார். இதில் ஏராளமான விவசாயிகள் மற்றும் பல்கலைக்கழக மாணவ, மாணவிகள் கலந்து கொண்டனர்.
