அமெரிக்காவில் இருந்து நாடு கடத்தப்பட்ட பயங்கரவாதி ராணாவிடம் என்ஐஏ அதிகாரிகள் தீவிர விசாரணை நடத்தி வருகின்றனர். விசாரணைக்காக 18 நாள் காவலில் வைக்கப்பட்ட பிறகு ராணா உயர் பாதுகாப்பு அறைக்கு அழைத்துச் செல்லப்பட்டார். மும்பையில் கடந்த 2008-ம் ஆண்டு நவம்பர் 26-ம் தேதி பாகிஸ்தானை சேர்ந்த 10 தீவிரவாதிகள் தாக்குதல் நடத்தினர். இந்த தாக்குதலில் 166 பேர் கொல்லப்பட்டனர்.
மும்பை தாக்குதல் வழக்கில் தஹாவூர் ராணா (64) மீது மும்பை குற்றப்பிரிவு போலீசார் 405 பக்க கூடுதல் குற்றப்பத்திரிகையை தாக்கல் செய்தனர். அவர் மீது கொலை, கொலை முயற்சி, இந்தியாவுக்கு எதிராக போர் தொடுத்தல் உள்ளிட்ட குற்றச்சாட்டுகள் பதிவு செய்யப்பட்டுள்ளன. மும்பையில் தாக்குதல்களை நடத்த முக்கிய சதிகாரரான டேவிட் கோல்மன் ஹெட்லிக்கு உதவியதாகவும் குற்றம் சாட்டப்பட்டுள்ளது. தஹவோர் ராணா 2009-ல் அமெரிக்காவில் கைது செய்யப்பட்டார். அவரை இந்தியா கொண்டுவர மத்திய அரசு நடவடிக்கை எடுத்தது.
பல வருட முயற்சிகளுக்குப் பிறகு, இந்தியாவின் கோரிக்கையை ஏற்று நாட்டின் உச்ச நீதிமன்றம், ராணாவை இந்தியாவுக்கு நாடு கடத்த அனுமதித்தது. அமெரிக்க அதிகாரிகள் ராணாவை இந்திய அணியிடம் ஒப்படைத்ததையடுத்து, ராணா நேற்று முன்தினம் சிறப்பு விமானம் மூலம் டெல்லிக்கு அழைத்து வரப்பட்டார். விமான நிலையம் வந்ததும், என்ஐஏ அதிகாரிகள் அவரை முறைப்படி கைது செய்தனர். பின்னர், டெல்லி சிறப்பு நீதிமன்றத்தில் ஆஜர்படுத்துவதற்காக அவரை காவலில் வைத்து விசாரிக்க அதிகாரிகள் அனுமதி கோரினர்.
அவர்களின் கோரிக்கையை ஏற்று நீதிமன்றம் ராணாவை 18 நாட்கள் என்ஐஏ விசாரிக்க உத்தரவிட்டுள்ளது. நீதிமன்ற உத்தரவையடுத்து, ராணா பலத்த பாதுகாப்புடன் என்ஐஏ தலைமையகத்துக்கு அழைத்துச் செல்லப்பட்டார். அவர் என்ஐஏ அலுவலகத்தில் உயர் பாதுகாப்பு அறையில் தங்க வைக்கப்பட்டார். அவரிடம் என்ஐஏ அதிகாரிகள் தீவிர விசாரணை நடத்தி வருகின்றனர்.
