ஏப்ரல் 22 அன்று, ஜம்மு-காஷ்மீரின் பஹல்காம் பகுதியில் நடந்த பயங்கரவாத தாக்குதலில் 26 பேர் கொல்லப்பட்டனர். இந்தத் தாக்குதலில் பாகிஸ்தான் ஈடுபட்டதாக இந்தியா குற்றம் சாட்டியுள்ளது. தாக்குதலுக்கு காரணமானவர்கள் மீது நடவடிக்கை எடுக்க பிரதமர் நரேந்திர மோடி முப்படைகளுக்கும் முழு அதிகாரம் வழங்கியுள்ளார். இதன் காரணமாக, இந்தியாவிற்கும் பாகிஸ்தானுக்கும் இடையே போர் பதற்றம் நிலவுகிறது. இந்த சூழலில், பாகிஸ்தான் ராணுவம் கடந்த சனிக்கிழமை தரையில் இருந்து பறந்து சென்று 450 கிலோமீட்டர் தொலைவில் தரையில் உள்ள மற்றொரு இலக்கைத் தாக்கும் திறன் கொண்ட ஏவுகணையை சோதித்தது.
இந்த சூழலில், 120 கிலோமீட்டர் தொலைவில் உள்ள இலக்கைத் தாக்கும் திறன் கொண்ட ஏவுகணையை வெற்றிகரமாக சோதித்ததாக பாகிஸ்தான் ராணுவம் நேற்று தெரிவித்துள்ளது. இது 3 நாட்களில் இரண்டாவது ஏவுகணை சோதனை. வீரர்களின் செயல்பாட்டுத் தயார்நிலையை உறுதி செய்வதற்கும், ஏவுகணையின் மேம்பட்ட செயல்திறன் மற்றும் மேம்பட்ட துல்லியம் உள்ளிட்ட தொழில்நுட்ப அம்சங்களைச் சரிபார்க்கவும் இந்த ஏவுகணை சோதனை நடத்தப்பட்டது. இது வெற்றிகரமாக இருந்தது என்று ராணுவம் ஒரு அறிக்கையில் தெரிவித்துள்ளது.
பாகிஸ்தான் பிரதமர் ஷெஹ்பாஸ் ஷெரீப் ஒரு அறிக்கையில், “இராணுவத்தின் தயார்நிலை முழுமையாக திருப்திகரமாக உள்ளது. இந்த வெற்றிகரமான ஏவுகணை சோதனை நாட்டின் பாதுகாப்பு வலுவான நிலையில் இருப்பதைக் காட்டுகிறது” என்று கூறினார்.
