ஒட்டாவா: கனடாவின் டொராண்டோ மாகாணத்தில் உள்ள பிராம்டன் பகுதியில் உள்ள இந்து சபா கோவில் மீது காலிஸ்தான் தீவிரவாதிகள் குழு நேற்று தாக்குதல் நடத்தியது. கோயிலில் இருந்த குழந்தைகள், பெண்கள் உள்ளிட்ட பக்தர்கள் மீதும் பயங்கரவாதிகள் தாக்குதல் நடத்தினர். கனடாவில் உள்ள தூதரக முகாமுக்கு இந்திய அதிகாரிகள் வருகைக்கு எதிர்ப்பு தெரிவித்து காலிஸ்தான் ஆதரவாளர்கள் போராட்டத்தில் ஈடுபட்டது தெரியவந்தது.
இந்த தாக்குதலின் போது அப்பகுதி வன்முறையின் மையமாக மாறியது. அங்கிருந்த இந்து மக்களை விரட்டியடித்தனர். இது தொடர்பான வீடியோ இணையத்தில் வைரலாக பரவி வருகிறது. இந்த சம்பவத்திற்கு கனடா பிரதமர் ஜஸ்டின் ட்ரூடோ கண்டனம் தெரிவித்துள்ளார். இது குறித்து கனேடிய பிரதமர் ட்ரூடோ சமூக வலைதளத்தில் வெளியிட்டுள்ள பதிவில் கூறியிருப்பதாவது:-
பிராம்ப்டனில் உள்ள இந்து கோவிலில் நடந்த வன்முறையை ஏற்றுக்கொள்ள முடியாது. ஒவ்வொரு கனடியர்களும் தங்கள் நம்பிக்கையை சுதந்திரமாகவும் பாதுகாப்பாகவும் கடைப்பிடிக்க உரிமை உண்டு. இந்த சம்பவம் குறித்து போலீசார் விரிவான விசாரணை நடத்த வேண்டும். இவ்வாறு அவர் கூறினார்.
இந்நிலையில் பிரதமர் மோடி தனது எக்ஸ் இணையதளத்தில் நேற்று கூறியதாவது:- கனடாவில் இந்து கோவில்கள் மற்றும் இந்துக்கள் மீது தாக்குதல் நடத்த திட்டமிட்டுள்ளனர். இந்த சம்பவத்தை வன்மையாக கண்டிக்கிறேன். அதே நேரத்தில், கனடாவில் உள்ள இந்திய தூதரக அதிகாரிகளை அச்சுறுத்தும் கோழைத்தனமான கனேடிய பிரதமர் ஜஸ்டின் ட்ரூடோவின் நிர்வாகத்தையும் கண்டிக்கிறேன். இத்தகைய வன்முறைச் செயல்கள் இந்தியாவின் உறுதியை ஒருபோதும் பலவீனப்படுத்தாது.
இந்த விவகாரத்தில் கனடா அரசு நீதியை நிலைநாட்டி சட்டத்தை அமல்படுத்தும் என எதிர்பார்க்கிறோம். இவ்வாறு பிரதமர் மோடி கூறினார். ஹர்தீப் சிங் நிஜ்ஜார் கொல்லப்பட்டதைத் தொடர்ந்து, கனடாவுக்கான இந்திய தூதர் சஞ்சய் குமார் வர்மா உட்பட 6 இந்திய தூதர்களை கனடா அரசு வெளியேற்றியது.
இதன் எதிரொலியாக இந்தியாவில் பணிபுரிந்து வந்த 6 கனேடிய தூதரக அதிகாரிகளை மத்திய அரசு வெளியேற்றியது. இந்தியாவுக்கும் கனடாவுக்கும் இடையிலான உறவு மோசமடைந்துள்ள நிலையில், முதல் முறையாக கனடாவுக்கு பிரதமர் மோடி கண்டனம் தெரிவித்திருப்பது முக்கியத்துவம் பெற்றுள்ளது.
இந்நிலையில், கனடாவில் இந்துக்கள் மற்றும் இந்து கோவில்கள் மீது நடத்தப்பட்ட தாக்குதலுக்கு இந்தியா தனது கடும் கண்டனத்தையும் அதிருப்தியையும் தெரிவித்துள்ளது. இதுகுறித்து கனடா தலைநகர் ஒட்டாவாவில் உள்ள இந்திய தூதரகத்தின் உயர் அதிகாரிகள் கூறியதாவது:- டொராண்டோவில் உள்ள தூதரகத்திற்கு வெளியே போராட்டம் நடத்திய காலிஸ்தான் தீவிரவாதிகள் இந்து கோவில்கள் மற்றும் இந்து பக்தர்கள் மீது திட்டமிட்ட தாக்குதல் நடத்தியுள்ளனர்.
கனடாவில் நிலவும் சூழ்நிலை காரணமாக, வழக்கமான இராஜதந்திர பணிகள் மற்றும் நிகழ்வுகளுக்கு கூடுதல் பாதுகாப்பு நடவடிக்கைகளை எடுக்குமாறு கனேடிய அதிகாரிகளிடம் இந்தியா முன்பு கோரிக்கை விடுத்திருந்தது. ஆனால், எங்கள் பணிக்கு இடையூறு விளைவிக்கும் இதுபோன்ற செயல்கள் அதிருப்தியை ஏற்படுத்தியுள்ளது. கனடாவில் வாழும் இந்தியர்களின் பாதுகாப்பு குறித்தும் நாங்கள் மிகுந்த அக்கறை கொண்டுள்ளோம்.
இந்து கோவில் மீதான தாக்குதல் சம்பவத்தை கண்டிக்கிறோம். இவ்வாறு அதிகாரிகள் தெரிவித்தனர். இது குறித்து கனடா எதிர்க்கட்சித் தலைவர் பியரி போய்லீவர் கூறும்போது, ”பிராம்டன் இந்து சபா கோவிலில் நடந்த சம்பவங்கள் முற்றிலும் ஏற்றுக்கொள்ள முடியாதவை. கண்டிக்கத்தக்கது. இந்த சம்பவத்திற்கு காரணமானவர்கள் மீது கனடா அரசு உடனடியாக நடவடிக்கை எடுக்க வேண்டும்,” என்றார்.
இந்த சம்பவத்திற்கு கனடா எம்.பி. சந்திர ஆர்யா, ஒன்டாரியோ சீக்கியர்கள் மற்றும் குருத்வாரா கவுன்சில்கள் (ஓஎஸ்ஜிசி), விஎச்பி இன்டர்நேஷனல் எக்ஸிகியூட்டிவ் தலைவர் அலோக் குமார் ஆகியோர் கனடிய அரசுக்கு கடும் கண்டனம் தெரிவித்துள்ளனர்.
