டாக்கா நகரத்தில் இருந்து வந்த தகவலின்படி, வங்கதேசத்தின் முன்னாள் பிரதமர் ஷேக் ஹசீனாவை கைது செய்யும் வகையில் ரெட் கார்னர் நோட்டீஸ் பிறப்பிக்க, இன்டர்போலிடம் அதிகாரப்பூர்வமாக வங்கதேச அரசு கோரிக்கை வைத்துள்ளது. கடந்த ஆண்டு வங்கதேசத்தில் ஏற்பட்ட மாணவர் போராட்டங்களைத் தொடர்ந்து, அந்நாட்டின் பிரதமராக இருந்த ஷேக் ஹசீனா பதவியை விலகினார். பிறகு, இந்தியாவிற்கு வந்து தஞ்சம் புகுந்தார்.
அவரது ராஜினாமைக்குப் பிறகு, முகமது யூனுஸ் தலைமையில் ஒரு இடைக்கால அரசு நிறுவப்பட்டது. இதைத் தொடர்ந்து, ஷேக் ஹசீனாவிற்கு எதிராக பலத்த குற்றச்சாட்டுகள் முன்வைக்கப்பட்டன. அதில் முக்கியமானவை இனப்படுகொலை மற்றும் ஊழல் தொடர்பானவையாகும். இவ்வழக்குகளில் அவருக்கு எதிராக கைது வாரண்டும் பிறப்பிக்கப்பட்டது.
வங்கதேச அரசு, கடந்த ஆண்டே இந்திய அரசு வழியாக ஷேக் ஹசீனாவை நாடு கடத்தக் கோரியிருந்தது. ஆனால், இந்திய மத்திய அரசு அந்த கோரிக்கையை ஏற்கவில்லை. இதனையடுத்து, இந்த விவகாரம் மேலும் வலுப்பெற்று, தற்போது சர்வதேச போலீஸ் அமைப்பான இன்டர்போலிடம் ரெட் கார்னர் நோட்டீஸ் கோரப்பட்டுள்ளது.
இந்த நோட்டீஸ் கோரிக்கை, ஷேக் ஹசீனா மட்டும் இல்லாமல், அவருடன் தொடர்புடைய மேலும் 12 நபர்களுக்கும் எதிராக முன்வைக்கப்பட்டுள்ளது. இவர்கள் அனைவரும் தற்போது இந்தியா மற்றும் பிற நாடுகளில் தஞ்சமடைந்துள்ளதாக வங்கதேச அரசு தெரிவித்துள்ளது.
இன்டர்போல் என்பது, உலகளவில் 195 நாடுகளை உள்ளடக்கிய சர்வதேச காவல்துறை அமைப்பாகும். இது, பல்வேறு நாடுகளில் பதுங்கியிருக்கும் குற்றவாளிகளை கண்காணித்து, அவர்களை தங்கள் சொந்த நாட்டுக்குத் திருப்பி அனுப்ப உதவுகிறது. அந்த வகையில், ரெட் கார்னர் நோட்டீஸ் என்பது, குற்றவாளியை கைது செய்யும் நோக்கத்துடன் வெளியிடப்படும் முக்கிய அறிவிப்பாகும்.
இந்த நடவடிக்கை, வங்கதேச அரசியல் சூழ்நிலையில் பெரும் தாக்கத்தை ஏற்படுத்தும் என்று நிபுணர்கள் கருதுகின்றனர். இந்நிலையில், இந்திய அரசின் அடுத்த கட்ட நடவடிக்கை என்னவாக இருக்கும் என்பது ஆவலோடு எதிர்பார்க்கப்படுகிறது. ஷேக் ஹசீனா இந்தியாவில் பாதுகாப்புடன் தங்கி இருப்பதால், இருநாடுகளுக்கும் இடையே புதிய விவாதங்களை இந்த கோரிக்கை உருவாக்கும் என்று கூறப்படுகிறது.
இந்த விவகாரம் சர்வதேச அளவில் முக்கியத்துவம் பெறக்கூடியதாக மாறியுள்ள நிலையில், இன்டர்போல் எப்போது நடவடிக்கை எடுக்கும் என்பது கவனிக்கத்தக்க அம்சமாக உள்ளது.
