டெல்லி: தமிழ்நாட்டில் மும்மொழிக் கொள்கையை அமல்படுத்தக் கோரிய மனுவை உச்ச நீதிமன்றம் தள்ளுபடி செய்துள்ளது. பாஜக வழக்கறிஞர் ஜி.எஸ். மணி, தமிழ்நாடு, கேரளா மற்றும் மேற்கு வங்க அரசுகளுக்கு எதிராக உச்ச நீதிமன்றத்தில் பொதுநல வழக்கு தொடர்ந்துள்ளார். அதில், தேசிய கல்விக் கொள்கை என்பது அனைத்து தரப்பு மாணவர்களுக்கும் பள்ளிக் கல்வியின் தரத்தை மேம்படுத்துவதையும், ஏழைகள், பழங்குடியினர், பிற்படுத்தப்பட்டோர் மற்றும் மிகவும் பிற்படுத்தப்பட்ட வகுப்பைச் சேர்ந்த பள்ளிக் குழந்தைகள் அனைத்து இந்திய மொழிகளையும் இலவசமாகக் கற்க வேண்டும் என்பதையும் நோக்கமாகக் கொண்டு மத்திய அரசு கொண்டு வந்த கல்விக் கொள்கைத் திட்டமாகும்.
தமிழ்நாடு, கேரளா, மேற்கு வங்கம் உள்ளிட்ட மாநில அரசுகள் அரசியல் காரணங்களுக்காக இதை ஏற்க மறுக்கின்றன. எனவே, தேசிய கல்விக் கொள்கையை தமிழ்நாடு, கேரளா மற்றும் மேற்கு வங்கத்தில் அமல்படுத்த வேண்டும் என்று அவர் மனுவில் கோரியிருந்தார். இந்த சூழ்நிலையில், இந்த மனு மீதான விசாரணை நீதிபதிகள் ஜே.பி.பர்திவாலா மற்றும் ஆர். மகாதேவன் ஆகியோர் அடங்கிய அமர்வில் விசாரணைக்கு வந்தது. அப்போது, அரசியலமைப்பின் 32-வது பிரிவின் கீழ், எந்தவொரு மாநிலத்தையும் தேசிய கல்விக் கொள்கையை ஏற்றுக்கொள்ளும்படி கட்டாயப்படுத்த நீதிமன்றம் எந்த உத்தரவையும் பிறப்பிக்க முடியாது என்று நீதிபதிகள் தெரிவித்தனர்.
மேலும், தேசிய கல்விக் கொள்கை 2020 போன்ற கொள்கையை ஏற்றுக்கொள்ள ஒரு மாநிலத்தை நேரடியாக கட்டாயப்படுத்த முடியாது. இருப்பினும், தேசிய கல்விக் கொள்கை தொடர்பாக ஒரு மாநிலத்தின் நடவடிக்கை அல்லது செயலற்ற தன்மை ஏதேனும் அடிப்படை உரிமைகளை மீறினால் நீதிமன்றம் தலையிடலாம். இந்த ரிட் மனுவில் இந்தப் பிரச்சினையை ஆராய நாங்கள் முன்மொழியவில்லை. மனுதாரருக்கும் மனுவில் எழுப்பப்பட்ட அம்சத்திற்கும் எந்த தொடர்பும் இல்லை என்று கூறி, நீதிபதிகள் மனுவை தள்ளுபடி செய்தனர்.
