சென்னை: முன்னாள் முதல்வர் ஜெயலலிதா அப்பல்லோ மருத்துவமனையில் உயிருக்கு போராடிக் கொண்டிருந்த காலத்தில், சசிகலா 450 கோடி ரூபாயை ரொக்கமாகக் கொடுத்து காஞ்சிபுரம் மாவட்டத்தில் பத்மாவதி சுகர்ஸ் லிமிடெட் என்ற பெயரில் இயங்கிய சர்க்கரை ஆலையை வாங்கியதாக சிபிஐ விசாரணையில் தெரியவந்துள்ளது. பணமதிப்பிழப்பு நடவடிக்கைக்கு பின்னர் சில வாரங்களிலேயே இத்தகைய பரிமாற்றம் நடந்ததாகக் கூறப்படுவதால் அரசியல் வட்டாரத்தில் பெரும் அதிர்ச்சி நிலவுகிறது.
இந்தியன் ஓவர்சீஸ் வங்கியில் இருந்து 120 கோடி ரூபாய் கடன் பெற்று மோசடி செய்ததாக குற்றச்சாட்டுகள் எழுந்துள்ளன. இதற்கான வழக்கு சென்னை உயர்நீதிமன்றத்தில் தொடரப்பட்டு, அதனைத் தொடர்ந்து சிபிஐ விசாரணை தொடங்கியது. கடந்த ஜூலையில் வழக்குப் பதிவு செய்யப்பட்ட நிலையில், ஆகஸ்ட் மாதத்தில் ஆலையுடன் தொடர்புடைய இடங்களில் அதிரடி சோதனைகள் மேற்கொள்ளப்பட்டன. விசாரணை நேரத்தில், 450 கோடி ரூபாய் பழைய 500 மற்றும் 1000 ரூபாய் நோட்டுகளாக வழங்கப்பட்டதாக நிறுவன இயக்குநர் ஹிதேஷ் ஷிவ்கன் படேல் வாக்குமூலம் அளித்துள்ளார்.
வருமான வரித்துறை இந்த ஆலையை பினாமி சொத்தாக அறிவித்து, சசிகலா உண்மையான உரிமையாளர் என குறிப்பிட்டுள்ளது. 2017 ஆம் ஆண்டு சசிகலா மற்றும் அவரது குடும்பத்தினருடன் தொடர்புடைய இடங்களில் வருமான வரித்துறை சோதனைகள் நடத்தி, அந்த சர்க்கரை ஆலையைச் சார்ந்த ஆவணங்களை கைப்பற்றியிருந்தது. மேலும், வங்கிக் கணக்குகளிலிருந்து பணத்தை மற்ற நிறுவனங்களுக்குத் திசைதிருப்பியதும், மோசடியான கடன் பெற்றதும், பணமதிப்பிழப்பு காலத்தில் சந்தேகத்திற்கிடமாக ரொக்கப் பணத்தை வங்கிகளில் செலுத்தியதும் விசாரணையில் வெளிப்பட்டுள்ளது.
சசிகலா மீதான இந்த வழக்கு மீண்டும் அரசியல் சூழலில் பரபரப்பை ஏற்படுத்தியுள்ளது. அதிமுகவில் மீண்டும் இணைய முயற்சித்து வரும் சூழலில் இத்தகைய விசாரணை சசிகலாவுக்கு சவாலாக அமையும் நிலையில் உள்ளது. ஜெயலலிதா மருத்துவமனையில் இருந்த காலத்தில் நடந்த பரிமாற்றம் என்பதால் இது மேலும் விவாதத்திற்குரியதாகியுள்ளது.
