புதுடில்லி: ஆப்கானிஸ்தானுடன் மோதலில் ஈடுபட்டுள்ள பாகிஸ்தான், தன் உள்நாட்டு தோல்விகளை மறைக்க அண்டை நாடுகளுக்கு குறைசொல்கிறது என்று மத்திய வெளியுறவுத்துறை அமைச்சகம் தெரிவித்துள்ளது.
பாகிஸ்தான்–ஆப்கானிஸ்தான் எல்லையில் கடந்த சில நாட்களாக வன்முறை மோதல்கள் தீவிரமடைந்துள்ளன. இரு தரப்பினரும் மாறி மாறி நடத்தும் தாக்குதல்களால் எல்லை பகுதிகளில் பதற்றமான சூழ்நிலை நிலவுகிறது. பல பொதுமக்கள் மற்றும் ராணுவத்தினர் உயிரிழந்துள்ளனர்.
இந்நிலையில், டில்லியில் நிருபர்களை சந்தித்த வெளியுறவுத்துறை செய்தித் தொடர்பாளர் ரன்தீர் ஜெயிஸ்வால் கூறினார்: “இந்தியா இரு நாடுகளின் மோதலை நெருக்கமாக கவனித்து வருகிறது. பயங்கரவாதிகளை ஆதரித்து செயல்படும் பாகிஸ்தான், தனது சொந்த தோல்விகளுக்கு பிறரை குறை கூறுகிறது. ஆப்கானிஸ்தான் தனது இறையாண்மையையும் சுதந்திரத்தையும் பாதுகாக்கும் உரிமை பெற்றது. இந்தியா அதன் இறையாண்மை மற்றும் பிராந்திய ஒருமைப்பாட்டை உறுதியாக ஆதரிக்கிறது” என்றார்.
மேலும் அவர் கூறியதாவது: “ஆப்கானில் தற்போது இந்தியா சார்பில் தொழில்நுட்ப மையம் இயங்கி வருகிறது. அதை விரைவில் முழுமையான தூதரகமாக மாற்ற நடவடிக்கை எடுக்கப்படுகிறது,” என்றார். இதன்மூலம் இந்தியா தனது தூரநோக்கை மீண்டும் வெளிப்படுத்தியுள்ளது — அண்டை நாடுகளில் அமைதி, ஒருமைப்பாடு மற்றும் சுயநிறைவை வலியுறுத்தும் நாடாக.
