தமிழகத்தில் பெண்களுக்கு எதிரான குற்றங்களைத் தடுப்பதற்கும், பொது இடங்களில் பாதுகாப்பை அதிகரிப்பதற்கும் செயற்கை நுண்ணறிவு தொழில்நுட்பத்துடன் கூடிய 2,355 கண்காணிப்பு கேமராக்களை நிறுவ காவல்துறை திட்டமிட்டுள்ளது.
மாநிலம் முழுவதும் அடையாளம் காணப்பட்ட 1,045 இடங்களில் இந்தக் கேமராக்கள் பொருத்தப்பட உள்ளதாகத் தகவல்கள் வெளியாகியுள்ளன. குறிப்பாக பெண்கள் அதிகமாகச் செல்லும் பொதுப் போக்குவரத்துப் பகுதிகள், முக்கியச் சாலைகள் மற்றும் மக்கள் அதிகம் கூடும் இடங்களில் கண்காணிப்பை வலுப்படுத்த நடவடிக்கை எடுக்கப்படுகிறது.
சென்னை, தாம்பரம், ஆவடி, மதுரை, திருச்சி, கோவை உள்ளிட்ட முக்கிய நகரங்களில் இந்தத் திட்டம் செயல்படுத்தப்பட உள்ளது. செயற்கை நுண்ணறிவு தொழில்நுட்பத்தின் உதவியுடன் சந்தேகத்திற்கிடமான நடமாட்டங்களைக் கண்காணித்து, குற்றச் சம்பவங்களைத் தடுப்பதற்கான நடவடிக்கைகளை மேற்கொள்ள முடியும் என எதிர்பார்க்கப்படுகிறது.
குறிப்பாக பெண்களைப் பின்தொடர்தல், பொது இடங்களில் தொந்தரவு செய்தல் உள்ளிட்ட குற்றங்களைத் தடுப்பதில் இந்தக் கண்காணிப்பு அமைப்பு உதவியாக இருக்கும் எனக் கூறப்படுகிறது. திட்டம் நடைமுறைக்கு வந்தால் நகர்ப்புறப் பாதுகாப்பு கட்டமைப்பில் முக்கியமான மாற்றம் ஏற்படலாம்.
