ஆசிய நாடான வியட்நாமுக்கும் தென் அமெரிக்க நாடான சிலிக்கும் இடையிலான உறவில் முக்கியமான முன்னேற்றம் ஏற்பட்டுள்ளது. இரு நாடுகளுக்கும் இடையிலான 55 ஆண்டுகால தூதரக உறவை அடுத்த கட்டத்திற்கு எடுத்துச் செல்லும் வகையில், இரு நாடுகளும் தங்களது உறவை மூலோபாயக் கூட்டாண்மையாக உயர்த்த முடிவு செய்துள்ளன. இதற்கான அறிவிப்பு நவம்பர் 16-ம் தேதி நடைபெற்ற உயர்மட்ட பேச்சுவார்த்தையில் வெளியானது.
வியட்நாமின் கட்சி பொதுச் செயலாளரும் அதிபருமான டோ லாம் மற்றும் சிலி அதிபர் ஜோஸ் அன்டோனியோ காஸ்ட் ரிஸ்ட் ஆகியோர் ஹனோயில் சந்தித்துப் பேச்சுவார்த்தை நடத்தினர். சிலி அதிபர் தனது மனைவி மற்றும் உயர்மட்டக் குழுவினருடன் நவம்பர் 15 முதல் 17 வரை வியட்நாமில் சுற்றுப்பயணம் மேற்கொண்டு வருகிறார். இந்தப் பயணம் இரு நாடுகளின் உறவுக்கு புதிய வேகத்தை அளிக்கும் எனத் தெரிவிக்கப்பட்டுள்ளது.
வர்த்தகம், விவசாயம், பாதுகாப்பு, கனிம வளங்கள், வங்கி, கடல்சார் பொருளாதாரம், போக்குவரத்து, சுற்றுலா மற்றும் கல்வி உள்ளிட்ட துறைகளில் ஒத்துழைப்பை அதிகரிக்க இரு தலைவர்களும் ஒப்புக்கொண்டனர். குறிப்பாக சூரியசக்தி, காற்றாலை மின்சாரம், பசுமை ஹைட்ரஜன் உற்பத்தி, கனிம வளங்களை சுற்றுச்சூழலுக்கு பாதிப்பு ஏற்படாத வகையில் பயன்படுத்துதல் போன்ற துறைகளில் இணைந்து செயல்படவும் முடிவு செய்யப்பட்டுள்ளது.
மேலும் இரு நாடுகளுக்கும் இடையிலான வர்த்தக ஒப்பந்தங்களை முழுமையாகப் பயன்படுத்தி முதலீடுகளை அதிகரிப்பதற்கான நடவடிக்கைகளும் மேற்கொள்ளப்பட உள்ளன. வியட்நாம் – சிலி உறவை வலுப்படுத்தும் செயல் திட்டத்தை விரைவில் உருவாக்கவும் முடிவு செய்யப்பட்டுள்ளது. ஆசியா மற்றும் தென் அமெரிக்காவுக்கு இடையிலான பொருளாதாரத் தொடர்புகளை விரிவுபடுத்த இந்தக் கூட்டாண்மை உதவும் என எதிர்பார்க்கப்படுகிறது.
