புதுடெல்லி: காலிஸ்தான் பிரிவினைவாதிகளுக்கு எதிரான வன்முறைக்கு உள்துறை அமைச்சர் அமித் ஷா உத்தரவிட்டதாக கனடா அமைச்சர் டேவிட் மாரிசனின் குற்றச்சாட்டுக்கு இந்திய அரசு கடும் கண்டனம் தெரிவித்துள்ளது.
இந்தக் குற்றச்சாட்டு அபத்தமானது, அடிப்படை ஆதாரமற்றது என்று கூறியுள்ள இந்திய அரசு, இதுகுறித்து விளக்கம் அளிக்குமாறு கனடா தூதரக அதிகாரிக்கு சம்மன் அனுப்பியுள்ளது. காலிஸ்தான் பிரிவினைவாதி ஹர்தீப் சிங் நிஜ்ஜார் ஜூன் 2023-ல் கனடாவில் படுகொலை செய்யப்பட்டார்.
கனடா பிரதமர் ஜஸ்டின் ட்ரூடோ இதற்கு பிரதமர் மோடி தலைமையிலான இந்திய அரசு உதவுவதாக குற்றம் சாட்டி பரபரப்பை ஏற்படுத்தினார். இதன் காரணமாக கடந்த ஓராண்டாக இந்தியா – கனடா இடையே மோதல் நிலவி வருகிறது. இந்நிலையில், கடந்த மே மாதம் கனடாவின் குற்றச்சாட்டுக்கு பதிலளித்த மத்திய வெளியுறவுத்துறை அமைச்சர் ஜெய்சங்கர், “ஹர்தீப் சிங் நிஜ்ஜார் கொலைக்கு இந்தியாவை குற்றம் சாட்டுவதற்கு கனேடிய அரசு எந்த ஆதாரத்தையும் வழங்கவில்லை.
கனடாவில் உள்நாட்டு அரசியலால் ஹர்தீப் சிங் கொல்லப்பட்டார். அவரது கொலைக்கும் இந்தியாவுக்கும் எந்த தொடர்பும் இல்லை. காலிஸ்தான் ஆதரவாளர்களின் சில பிரிவுகள் கனடாவில் தங்களுக்கென ஒரு வாக்கு வங்கியை உருவாக்கிக் கொண்டன. தற்போது ஆட்சியில் இருக்கும் அரசுக்கு பெரும்பான்மை பலம் இல்லை.
தவிர, சில கட்சிகள் காலிஸ்தான் ஆதரவாளர்களைச் சார்ந்து இருக்கின்றன. இந்நிலையில், வாக்கு வங்கியை குறிவைத்து நிஜ்ஜார் கொலை வழக்கில் இந்தியா மீது கனடா குற்றம் சாட்டி வருகிறது. இந்நிலையில், மத்திய உள்துறை அமைச்சர் அமித்ஷா மீது கனடா தற்போது குற்றம் சாட்டியுள்ளது. கனடாவில் உள்ள காலிஸ்தான் பிரிவினைவாதிகளை குறிவைத்து வன்முறை, மிரட்டல் மற்றும் உளவுத்துறை சேகரிப்புக்கு இந்திய உள்துறை அமைச்சர் அமித் ஷா உத்தரவிட்டதாக கனடாவின் துணை வெளியுறவு அமைச்சர் டேவிட் மாரிசன் சமீபத்தில் குற்றம் சாட்டியுள்ளார்.
இது குறித்து அமெரிக்காவின் வாஷிங்டன் போஸ்ட் நாளிதழ் சமீபத்தில் செய்தி வெளியிட்டிருந்தது. கனடாவில் சீக்கிய பிரிவினைவாதிகள் மீதான தாக்குதலுக்கு இந்திய உள்துறை அமைச்சர் அமித் ஷா அங்கீகாரம் அளித்துள்ளதாகவும், அதற்கான ஆதாரங்களை கனேடிய பாதுகாப்பு அமைப்புகள் சேகரித்துள்ளதாகவும் அந்த செய்தியில் கூறப்பட்டுள்ளது.
வாஷிங்டன் போஸ்ட்டில் இந்திய உள்துறை அமைச்சர் அமித் ஷாவின் பெயரைக் குறிப்பிட்டது நான்தான் என்று கனேடிய வெளியுறவுத்துறை துணை அமைச்சர் டேவிட் மாரிசன் தெரிவித்துள்ளார். இதற்கு இந்திய அரசு கடும் கண்டனம் தெரிவித்துள்ளது. கனடாவின் இந்தக் குற்றச்சாட்டு அபத்தமானது மற்றும் ஆதாரமற்றது என்பதை இந்திய அரசு உறுதிப்படுத்தியுள்ளது.
இந்த விவகாரத்தில் கனடா தரப்பில் விளக்கம் அளிக்குமாறு அந்நாட்டு தூதரக அதிகாரிக்கு மத்திய அரசு சம்மன் அனுப்பியுள்ளது. இதுகுறித்து மத்திய வெளியுறவுத்துறை அமைச்சக செய்தித் தொடர்பாளர் ரந்திர் ஜெய்ஸ்வால் கூறியதாவது:-
அக்டோபர் 29 அன்று, வெளியுறவுத்துறை துணை அமைச்சர் டேவிட் மாரிசன், கனடாவின் பொது பாதுகாப்பு மற்றும் தேசிய பாதுகாப்புக்கான நிலைக்குழு முன் இந்திய உள்துறை அமைச்சர் அமித் ஷாவிற்கு எதிராக அபத்தமான மற்றும் ஆதாரமற்ற குற்றச்சாட்டுகளை தெரிவித்தார். இதுகுறித்து, கனடா தூதரக அதிகாரியை அழைத்து இந்திய அரசு கடும் கண்டனத்தை பதிவு செய்துள்ளது. இந்திய தூதரக அதிகாரிகள் கனடிய அரசாங்கத்தால் மோசமாக நடத்தப்படுகிறார்கள் மற்றும் அவர்களின் நடவடிக்கைகள் கண்காணிக்கப்படுகின்றன.
அவர்களின் பேச்சு ஒட்டு கேட்கப்படுகிறது. அந்த வகையில், இராஜதந்திர விதிமுறைகளை மீறி கனேடிய அரசாங்கம் செயற்படுகின்றது. இத்தகைய நெருக்கடிக்கு மத்தியில்தான் கனடாவுக்கான இந்திய தூதரக அதிகாரிகள் பணிபுரிகின்றனர். இது தவிர, உலக அரங்கில் இந்தியாவுக்கு அவப்பெயரை ஏற்படுத்தும் வகையில் இந்தியா குறித்து தவறான கருத்துக்களை கனடா பரப்பி வருகிறது. இத்தகைய பொறுப்பற்ற செயல்கள் இருதரப்பு உறவுகளில் மோசமான விளைவுகளை ஏற்படுத்தும். இவ்வாறு அவர் கூறினார்.
