இலங்கை அதிபர் தேர்தல் கடந்த செப்டம்பர் 21-ம் தேதி நடைபெற்றது. இதில் தேசிய மக்கள் சக்தி (என்பிபி) கூட்டணி சார்பில் போட்டியிட்ட அனுரகுமார திசாநாயக்க வெற்றி பெற்று புதிய அதிபராக பதவியேற்றார். இதையடுத்து இலங்கை நாடாளுமன்றத் தேர்தல் கடந்த 14-ம் தேதி நடைபெற்றது.
மொத்தமுள்ள 225 இடங்களில் NPP கூட்டணி 159 இடங்களில் வெற்றி பெற்று அபார வெற்றி பெற்றது. இலங்கையின் புதிய பிரதமராக ஹரிணி அமரசூரிய கடந்த 18-ம் தேதி பதவியேற்றார். ஜனாதிபதி, பிரதமர் உட்பட 22 பேர் கொண்ட புதிய அமைச்சரவை நியமிக்கப்பட்டது. இந்நிலையில், இலங்கையின் 10-வது நாடாளுமன்றம் நேற்று கூடியது.
முதல் நாள் கூட்டத்தில் ஜனாதிபதி அனுரகுமார திஸாநாயக்க உரையாற்றினார். அவர் கூறியதாவது:- அனைத்து இன மக்களும் என்பிபி கூட்டணி மீது நம்பிக்கை வைத்து வாக்களித்துள்ளனர். இதன் மூலம் தேசிய நல்லிணக்கம் உறுதி செய்யப்பட்டுள்ளது. இனிமேல் இலங்கையில் இனவாதத்திற்கும் மதவாதத்திற்கும் இடமில்லை. குற்றங்களை தடுக்க கடும் நடவடிக்கை எடுக்கப்படும்.
ஜனாதிபதி உட்பட அனைவரும் சட்டத்திற்கு உட்பட்டு செயற்பட வேண்டும். பாதிக்கப்பட்ட மக்களுக்கு நீதி வழங்கப்படும். சர்வதேச நாணய நிதியத்தின் செயற்திட்டத்துடன் இலங்கையின் பொருளாதாரத்தை மீட்டெடுக்க கடுமையான நடவடிக்கை எடுக்கப்படும். பிப்ரவரியில் பொது பட்ஜெட் தாக்கல் செய்யப்படும். இவ்வாறு ஜனாதிபதி அனுரகுமார திஸாநாயக்க தெரிவித்தார்.
இலங்கை நாடாளுமன்றத்தின் புதிய சபாநாயகராக NPP கூட்டணியின் உறுப்பினரான கலாநிதி அசோக ரன்வல தெரிவு செய்யப்பட்டார். அவர் முன்னிலையில் புதிய எம்.பி.க்கள் பதவியேற்றுக்கொண்டனர்.
