சென்னை: இந்திய விவசாயிகளின் துயரங்களுக்கு நிரந்தர தீர்வு காண உச்சநீதிமன்றம் நியமித்த குழுவின் பரிந்துரையை தமிழ்நாடு விவசாயிகள் சங்கம் வரவேற்றுள்ளது. இதுகுறித்து நேற்று வெளியிட்ட அறிக்கையில், சங்கத்தின் பொதுச் செயலாளர் பி.எஸ். மாசிலாமணி கூறியதாவது:- 2020 நவம்பர் 26 முதல் 13 மாதங்களாக டெல்லி உட்பட இந்தியா முழுவதும் விவசாயிகள் போராட்டம் நடத்தி வந்தனர், மத்திய அரசு அளித்த வாக்குறுதியை நம்பி போராட்டம் கைவிடப்பட்டது.
ஆனால், இந்தக் கோரிக்கைகளை பிரதமர் மோடி நிறைவேற்றவில்லை. இந்த மூன்று சட்டங்களையும் வேறு வடிவில் கொண்டு வர முயற்சிக்கிறார். இதை எதிர்த்து ஹரியானா மற்றும் பஞ்சாப் விவசாயிகள் முதலில் டெல்லி நோக்கி போராட்டம் நடத்தினர். ஹரியானா அரசு அவர்களை மாநில எல்லையில் தடுத்து நிறுத்தியது, அரசு பயங்கரவாதிகளைப் போல அவர்கள் மீது பயங்கரவாத வன்முறையைக் கட்டவிழ்த்து விட்டது.
இந்நிலையில், உயர்நீதிமன்றத்தில் விவசாயிகள் தொடர்ந்த வழக்கில், போராட்டக்காரர்களை தடுக்கும் தடுப்புகளை உடனடியாக அகற்ற வேண்டும். போராட்டத்தில் ஈடுபட்டுள்ள விவசாயிகளுக்கு உரிய பாதுகாப்பு வழங்க வேண்டும் என உத்தரவிட்டது. இதை எதிர்த்து அரியானா அரசு உச்ச நீதிமன்றத்தில் மேல்முறையீடு செய்தது. இந்நிலையில் விவசாயிகள் பிரச்சனை பஞ்சாப், ஹரியானா மாநிலங்கள் மட்டுமின்றி நாடு முழுவதும் உள்ளது.
எனவே, இதுகுறித்து ஆய்வு செய்து உச்ச நீதிமன்றத்தில் அறிக்கை தாக்கல் செய்ய ஓய்வு பெற்ற உயர்நீதிமன்ற நீதிபதி தலைமையில் குழு அமைக்கப்பட்டது. இக்குழு கடந்த 4 மாதங்களாக ஆய்வு செய்து அறிக்கை சமர்பித்தது. பசுமைப் புரட்சியால் விளைச்சல் அதிகரித்துள்ளது. பருவநிலை பிரச்சனைகள், சரியான சந்தை வாய்ப்புகள் இல்லாதது, விளைபொருட்களுக்கு உரிய விலை இல்லாமை, விலைவாசி உயர்வு, கொள்முதல் உத்தரவாதமின்மை போன்ற காரணங்களால் 1995 முதல் 4 லட்சத்திற்கும் மேற்பட்ட விவசாயிகள் மற்றும் விவசாயத் தொழிலாளர்கள் தற்கொலை செய்துகொண்டுள்ளனர். இதனை இந்திய குற்ற ஆவணக் காப்பகம் உறுதி செய்துள்ளது.
உச்ச நீதிமன்றத்தால் அமைக்கப்பட்ட குழு 11 பக்க இடைக்கால அறிக்கையை சமர்ப்பித்துள்ளது. அதில் சிறு, குறு விவசாயிகள்தான் அதிகம் பாதிக்கப்படுகின்றனர். இந்த குழு நாடு முழுவதும் விரிவான ஆய்வு நடத்த வேண்டும் என்றும் கூறியுள்ளது. இந்த பரிந்துரையை வரவேற்கிறோம். மேலும், நாடு முழுவதும் உள்ள விவசாயப் பிரச்னைகள் குறித்து ஆய்வு செய்து, தொலைநோக்குப் பார்வையுடன் கூடிய தீர்வுகள் வகுக்கப்பட வேண்டும். இவ்வாறு அந்த அறிக்கையில் கூறப்பட்டுள்ளது.
