தூத்துக்குடி: இலங்கையில் சிறைபிடிக்கப்பட்ட தமிழக மீனவர்கள் 24 பேர் விடுவிக்கப்பட்டனர். தூத்துக்குடி மாவட்டம் தருவைகுளத்தை சேர்ந்த அந்தோணிமகராஜா (45), அந்தோணி டேனியலா ஆகியோருக்கு சொந்தமான படகில் 22 மீனவர்கள் கடந்த ஜூலை 21-ம் தேதி தருவகுளத்தில் இருந்து கடலுக்கு சென்றனர்.
ஆகஸ்ட் 5-ம் தேதி இலங்கை கடல் பகுதியில் மீன்பிடித்ததாக கூறப்படுகிறது. இலங்கை கடற்படையினர் 22 பேரையும் கைது செய்து சிறையில் அடைத்தனர். கைது செய்யப்பட்ட 22 மீனவர்களில் 10 பேருக்கு பல இலட்சம் ரூபா அபராதம் விதித்து புத்தளம் நீதிமன்றம் தீர்ப்பளித்துள்ளது. முதல்வர் மு.க. ஸ்டாலின் இதை முழுமையாக ரத்து செய்ய வேண்டும் என மற்றும் மீனவர்கள் தரப்பு வழக்கறிஞர்கள் வலியுறுத்தி வந்தனர்.
இந்நிலையில் வழக்கை விசாரித்த இலங்கை புத்தளம் நீதிமன்றம் 22 மீனவர்களில் 12 பேரை மட்டும் விடுதலை செய்து உத்தரவிட்டுள்ளது. இதையடுத்து, 118 நாட்களுக்கு பிறகு அவர்கள் 12 பேரும் நேற்று மாலை இலங்கையில் இருந்து விமானம் மூலம் சென்னை வந்தனர். இதேபோல் ராமேஸ்வரம் மீன்பிடி இறங்குதுறையில் இருந்து அக்., 22-ல் மீன்பிடிக்க சென்ற 16 மீனவர்கள் இலங்கை கடற்படையினரால் கைது செய்யப்பட்டனர். 2 மோட்டார் படகுகளும் பறிமுதல் செய்யப்பட்டன.
16 மீனவர்களும் யாழ்ப்பாணம் சிறையில் அடைக்கப்பட்டனர். இந்த வழக்கை நவ., 20ல் விசாரித்த ஊர்க்காவல் படை நீதிமன்றம், தமிழக மீனவர்கள் 16 பேரில் 4 பேருக்கு சிறை தண்டனை விதித்தது. எஞ்சிய 12 மீனவர்களும் இலங்கை கடற்பரப்பில் நுழைந்து மீன்பிடித்தால் சிறை தண்டனை விதிக்கப்படும் என எச்சரித்து விடுதலை செய்தது. விடுதலை செய்யப்பட்ட 12 மீனவர்களும் கொழும்பு விமான நிலையத்தில் இருந்து புறப்பட்டு நேற்று முன்தினம் இரவு சென்னை வந்தனர்.
அவர்களை தமிழக மீன்வளத்துறை அதிகாரிகள் வரவேற்று தனி வாகனத்தில் நேற்று ராமேஸ்வரம் அழைத்து வந்தனர். தண்டனையில் இருந்து தப்பிய மீனவர்களை அவர்களது குடும்பத்தினர் கண்ணீருடன் வரவேற்றனர்.
