ராமேஸ்வரம்: இலங்கை கடற்படையினரால் கைது செய்யப்பட்ட தமிழக மீனவர்கள் மற்றும் மீன்பிடி படகுகளை உடனடியாக விடுவிக்கக் கோரி ராமநாதபுரம் எம்.பி. நவஸ்கனி வெளியுறவுத்துறை அமைச்சர் ஜெய்சங்கருக்கு கடிதம் எழுதியுள்ளார்.
அந்தக் கடிதத்தில், “இலங்கை கடற்படையினரால் தமிழக மீனவர்கள் தொடர்ந்து கைது செய்யப்பட்டு வருகின்றனர். இதற்கு நிரந்தர தீர்வு காண வேண்டும் என்பது மீனவர்களின் நீண்டகால கோரிக்கையாக இருந்து வருகிறது. இருப்பினும், நிரந்தர தீர்வு இல்லாமல் மீனவர்கள் கைது செய்யப்பட்டு, அவர்களின் படகுகள் பறிமுதல் செய்யப்பட்டு வருகின்றன.
இது அவர்களின் வாழ்வாதாரத்தை பாதிக்கிறது. ஞாயிற்றுக்கிழமை, ராமேஸ்வரத்தைச் சேர்ந்த இரண்டு படகுகளையும் 8 மீனவர்களையும் இலங்கை கடற்படை சிறைபிடித்தது. கைது செய்யப்பட்ட மீனவர்களையும் அவர்களின் படகுகளையும் உடனடியாக விடுவிக்க நடவடிக்கை எடுக்க வேண்டும். தொடர்ந்து கைது செய்யப்படும் தமிழக மீனவர்களின் பிரச்சினைக்கு நிரந்தர தீர்வு காண உடனடியாக நடவடிக்கை எடுக்குமாறு கேட்டுக்கொள்கிறேன்.”
