புதுடெல்லி: தமிழக சட்டசபை தேர்தலில் திமுக ஆட்சி அகற்றப்படும் என மத்திய உள்துறை அமைச்சர் அமித்ஷா தெரிவித்துள்ளார். தனியார் தொலைக்காட்சி ஒன்றுக்கு அவர் அளித்த பேட்டியில் கூறியதாவது:- தமிழ்நாடு ஒரு காலத்தில் தென்னிந்தியாவில் முற்போக்கான மாநிலமாக கருதப்பட்டது. ஆனால் திமுக அரசின் தவறான கொள்கைகளால் தமிழகம் தடுமாறி, குழப்பத்தில் உள்ளது. தமிழக சட்டசபை தேர்தலை கருத்தில் கொண்டு தமிழக மக்களின் கவனத்தை திசை திருப்பும் முயற்சியில் செயல்தலைவர் ஸ்டாலின் ஈடுபட்டுள்ளார்.
அதனால் தான் தேசிய கல்வி கொள்கைக்கு எதிராக பேசுகிறார். தமிழக அரசு முதலில் தேசிய கல்விக் கொள்கையை ஏற்றுக்கொண்டது. பின்னர் திடீரென அதை ஏற்க மறுத்தது. இது தொடர்பான ஆவணங்களை நாடாளுமன்றத்தில் தாக்கல் செய்துள்ளோம். தமிழக சட்டசபை தேர்தல் நெருங்கி வருகிறது. ஊழல் விவகாரங்களால் ஆளும் திமுக அரசின் மீது மக்கள் ஏற்கனவே கடும் அதிருப்தியில் உள்ளனர். முதல்வர் ஸ்டாலின் தொடர்ந்து வாரிசு அரசியலை முன்னெடுத்து வருகிறார். அவர் தனது மகன் உதயநிதியை விளம்பரப்படுத்தி வருகிறார். இந்த பிரச்னைகளில் இருந்து மக்களின் கவனத்தை திசை திருப்பவே தேசிய கல்விக் கொள்கையை திமுக எதிர்க்கிறது.
இந்த உண்மை தமிழக மக்களுக்கு நன்றாகவே தெரியும். தேசிய கல்விக் கொள்கை தாய்மொழிக் கல்விக்கு முன்னுரிமை அளிக்கிறது. இதை அமல்படுத்தினால் தமிழில் கல்வி கற்பிக்கப்படும். பொறியியல் மற்றும் மருத்துவம் தொடர்பான உயர்கல்வி படிப்புகளும் தமிழில் கற்பிக்கப்படும். பொறியியல், மருத்துவப் படிப்புகளுக்கான பாடப்புத்தகங்களை தமிழில் மொழிபெயர்க்க வேண்டும் என்று தொடர்ந்து வலியுறுத்தி வருகிறேன். ஆனால் அவர்கள் அதை இதுவரை ஏற்கவில்லை. பொறியியல் கல்வி தெலுங்கு, மலையாளம், மராத்தி மற்றும் குஜராத்தி மொழிகளில் கற்பிக்கப்படுகிறது. சுமார் 1,500 பட்டப் புத்தகங்கள் 13 மொழிகளில் மொழிபெயர்க்கப்பட்டுள்ளன. மத்திய பல்கலைக்கழகங்களில் இளங்கலை மாணவர் சேர்க்கைக்கான பொது நுழைவுத் தேர்வு 13 மொழிகளில் நடத்தப்படுகிறது.
ஆனால் திமுகவின் எதிர்ப்பால் இந்த நுழைவுத் தேர்வை தமிழில் நடத்த முடியவில்லை. மக்களவைத் தொகுதி மறுவரையறை தொடர்பாக மத்திய அரசு எதையும் அறிவிக்கவில்லை. ஆனால் தமிழக சட்டசபை தேர்தலையொட்டி திமுகவினர் இந்த விவகாரத்தில் பிரச்னையை எழுப்புகின்றனர். கடந்த 5 ஆண்டுகளாக திமுக அரசு ஊழலில் மட்டுமே சிக்கித் தவிக்கிறது. இப்போது திடீரென எழுந்து லோக்சபா தொகுதி மறுசீரமைப்பு பற்றி பேசுகின்றனர். மக்களவைத் தொகுதிகள் மறுசீரமைக்கப்படும்போது யாருக்கும் அநீதி இழைக்கப்படாது. 0.0001 சதவீதம் கூட அநீதி இழைக்கப்படாது.
தமிழகத்தில் திமுக ஆட்சி தமிழ் மொழிக்கு எதிராக செயல்படுகிறது. திமுக அரசின் ஊழலால் இளைஞர்கள் தமிழகத்தை விட்டு வெளியேறி வருகின்றனர். தொழில்களும் வெளியேறுகின்றன. மக்கள் கடும் அதிருப்தியில் உள்ளனர். வரும் தமிழக சட்டசபை தேர்தலில் திமுக அரசு அகற்றப்படும். தேசிய ஜனநாயகக் கூட்டணி ஆட்சி அமைக்கும். அதிமுகவுடன் கூட்டணி தொடர்பாக பேச்சுவார்த்தை நடைபெற்று வருகிறது. உரிய நேரத்தில் அறிவிப்பு வெளியிடப்படும். 2047-ம் ஆண்டுக்குள் வளர்ந்த இந்தியாவை உருவாக்க பிரதமர் நரேந்திர மோடி இலக்கு நிர்ணயித்துள்ளார்.
இதற்காக மத்திய அரசு கடுமையாக உழைத்து வருகிறது. பொது சிவில் சட்டம் நாடு முழுவதும் அமல்படுத்தப்பட வேண்டும் என்று நாங்கள் விரும்புகிறோம். இதனை நிறைவேற்ற தொடர்ந்து முயற்சிப்போம். மணிப்பூரில் அமைதி திரும்பியுள்ளது. அந்த மாநிலத்தில் அனைத்து வர்த்தக நிறுவனங்களும் சந்தைகளும் வழக்கம் போல் இயங்கி வருகின்றன. இவ்வாறு அமைச்சர் அமித்ஷா கூறினார்.
