சிதம்பரம்: சிதம்பரம் நடராஜர் கோவிலுக்கு ஆஸ்திரேலியாவில் இருந்து நேற்று 50-க்கும் மேற்பட்ட சுற்றுலா பயணிகள் வந்து சுவாமி தரிசனம் செய்து, கோவிலில் உள்ள சிற்பங்களை கண்டு ரசித்தனர்.
கடலூர் மாவட்டம் சிதம்பரத்தில் உள்ள உலகப் பிரசித்தி பெற்ற நடராஜர் கோவிலில் சாமி தரிசனம் செய்ய தினமும் வெளியூர், வெளி மாவட்டம், வெளி மாநில பக்தர்கள், வெளிநாட்டை சேர்ந்த பொதுமக்கள், சுற்றுலா பயணிகள் வந்து செல்கின்றனர். இதேபோல் கர்நாடகா, ஆந்திரா, கேரளா உள்ளிட்ட மாநிலங்களில் இருந்து மேல்மருவத்தூர் கோவிலுக்கு வரும் செவ்வாடை பக்தர்கள் உள்ளிட்ட பக்தர்கள் நடராஜரை தரிசனம் செய்ய சிதம்பரத்தில் இருந்து அடிக்கடி வந்து செல்கின்றனர்.
இந்நிலையில், நேற்று காலை சிதம்பரம் நடராஜர் கோவிலுக்கு ஆஸ்திரேலியாவில் இருந்து ஆண்கள் மற்றும் பெண்கள் குழுவினர் வந்தனர். பின்னர் கீழ சன்னதி வழியாக கோயிலுக்குள் நுழைந்து நடராஜர், சிவகாமசுந்தரி அம்பாளை தரிசனம் செய்தனர். பின்னர் அங்குள்ள கோவிந்தராஜ பெருமாள், தாயார் சன்னதி உள்ளிட்ட இடங்களில் சாமி கும்பிட்டனர்.
அதன்பின், சிவகங்கை தீர்த்தக்குளம் அருகே உள்ள ஆதிமூலநாதர் சன்னதி, முருகன் சன்னதி, சிவகாமசுந்தரி அம்பாள் சன்னதி போன்ற தலங்களுக்கும் சென்று தரிசனம் செய்தனர். கோவில் தூண்களில் உள்ள சிற்பங்களையும் கண்டு ரசித்தனர். அப்போது அங்கிருந்த பக்தர்களிடம் கோயில் வரலாறு உள்ளிட்ட சில தகவல்களை கேட்டு ஆச்சரியமடைந்தனர்.
