சென்னை: விவசாய விளைபொருட்களுக்கு பரிந்துரை செய்து விலை நிர்ணயம் செய்யாத மத்திய அரசைக் கண்டித்து போராட்டம் நடத்திய தமிழ்நாடு விவசாயிகள் பாதுகாப்பு சங்கத்தைச் சேர்ந்த 40 பேர் வேளாண் விஞ்ஞானி எம்.எஸ். சுவாமிநாதன் குழுவினர் கைது செய்தனர். பஞ்சாபில் போராட்டம் நடத்திய விவசாயிகள் கைது செய்யப்பட்டதைக் கண்டித்து மார்ச் 23-ம் தேதி சென்னை, உசிலம்பட்டி, மயிலாடுதுறை, திருப்பூர் ஆகிய இடங்களில் ரயில் மறியல் போராட்டம் நடத்தப்படும் என தமிழ்நாடு விவசாயிகள் பாதுகாப்பு சங்கம் அறிவித்துள்ளது.
அதன்படி தமிழ்நாடு விவசாயிகள் பாதுகாப்பு சங்கத்தின் நிறுவனர் வக்கீல் ஈசன் முருகசாமி தலைமையில் விவசாயிகள் சென்னை எழும்பூர் ரயில் நிலையத்திற்கு மறியல் செய்ய வந்தனர். போலீசார் தடுத்து நிறுத்தியதையும் மீறி ரயில் நிலையத்திற்குள் நுழைய முயன்ற விவசாயிகள் 40 பேர் கைது செய்யப்பட்டனர். முன்னதாக ஈசன் முருகசாமி நிருபர்களிடம் கூறியதாவது:- 2014 லோக்சபா தேர்தலின் போது, விவசாயிகளுக்கு உற்பத்தி செலவில் 50 சதவீதம் வழங்கப்படும் என்றும், எம்.எஸ்., சுவாமிநாதன் பரிந்துரையின்படி விவசாய விளைபொருட்களுக்கு விலை நிர்ணயம் செய்து கொள்முதல் செய்யப்படும் என, பா.ஜ.க., வாக்குறுதி அளித்தது.
இது 12 ஆண்டுகளாகியும் நிறைவேற்றப்படவில்லை. இதனை கண்டித்தும், உடனடியாக அமல்படுத்தக்கோரியும் ரயில் மறியல் போராட்டம் நடத்தப்படுகிறது. அரசியல் சாசனம் அடிப்படை உரிமையாக வழங்கியுள்ள போராட்ட உரிமையை உறுதி செய்யக் கோரி இந்த போராட்டம் நடத்தப்படுகிறது. சென்னை மட்டுமின்றி மதுரை மாவட்டம் உசிலம்பட்டி, மயிலாடுதுறை, திருப்பூரில் ரயில் மறியல் போராட்டம் நடத்தப்பட்டுள்ளது. நூற்றுக்கணக்கானோர் கைது செய்யப்பட்டுள்ளனர். கோரிக்கை நிறைவேறும் வரை போராட்டம் தொடரும். இவ்வாறு அவர் கூறினார்.
