கொச்சி: கடந்த மாதம் கேரளாவின் வயநாடு தொகுதியில் நடைபெற்ற இடைத்தேர்தலில் காங்கிரஸ் கட்சியின் பொதுச் செயலாளர் பிரியங்கா காந்தி அக்கட்சியின் வேட்பாளராக போட்டியிட்டார். 5 லட்சம் வாக்குகள் வித்தியாசத்தில் வெற்றி பெற்றார். அவரது முந்தைய தேர்தல் பிரமாணப் பத்திரத்தில், தன்னிடம் ரூ.4.24 கோடி மதிப்புள்ள அசையும் சொத்துகளும், ரூ.13.89 கோடி மதிப்புள்ள அசையும் சொத்துகளும் இருப்பதாகவும், அவரது கணவர் ராபர்ட் வத்ரா ரூ.37.91 கோடி மதிப்புள்ள அசையும் சொத்துகள் இருப்பதாகவும் அறிவித்திருந்தார்.
பிரியங்கா காந்திக்கு ரூ.15.75 லட்சமும், ராபர்ட் வதேராவுக்கு ரூ.10,03,30,374 கடனும் உள்ளது. மேலும், தன்னிடம் ரூ.29.55 லட்சம் மதிப்புள்ள 59.83 கிலோ வெள்ளி பொருட்கள், 4.41 கிலோ தங்க ஆபரணங்கள், 2.5 கிலோ தங்கம், ரூ.8 லட்சம் மதிப்புள்ள ஹோண்டா சிஆர்வி கார் உள்ளதாக தேர்தல் பிரமாண பத்திரத்தில் தெரிவித்துள்ளார். மேலும், அசையா சொத்துகளின் அடிப்படையில் ரூ.2 கோடியே 10 லட்சத்துக்கும் அதிகமான மதிப்புள்ள விவசாய நிலம் தன்னிடம் இருப்பதாகவும் அவர் வாக்குமூலத்தில் குறிப்பிட்டுள்ளார்.
இது தவிர, சிம்லாவில் 48,997 சதுர அடியில் கட்டப்பட்ட வீடு இருப்பதாகவும் அவர் குறிப்பிட்டுள்ளார். இந்நிலையில், பா.ஜ.,வை சேர்ந்த நவ்யா ஹரிதாஸ், கேரள உயர் நீதிமன்றத்தில் தாக்கல் செய்த மனுவில், ‘காங்கிரஸ் பொதுச்செயலாளர் பிரியங்கா காந்தி வயநாடு தொகுதியில் போட்டியிட்டார். அவர் தாக்கல் செய்த தேர்தல் பிரமாணப் பத்திரத்தில், தனது சொத்துக்கள் மற்றும் குடும்பத்தின் சொத்துக்கள் குறித்த சரியான தகவல்களை தெரிவிக்கவில்லை.
அவர் பொய்யான தகவலை தெரிவித்துள்ளார். இது மாதிரி நடத்தை விதிகளுக்கு எதிரானது மற்றும் ஊழல் குற்றச்சாட்டுக்கு சமம். எனவே, பிரியங்கா காந்தியின் வெற்றியை ரத்து செய்ய வேண்டும்’ என கோரிக்கை விடுத்துள்ளார். இந்த மனு மீதான விசாரணை அடுத்த ஆண்டு ஜனவரியில் நடைபெறும் என எதிர்பார்க்கப்படுகிறது. வரும் 23-ம் தேதி முதல் ஜனவரி 5-ம் தேதி வரை கேரள உயர்நீதிமன்றத்துக்கு விடுமுறை என்பதால் இந்த வழக்கு ஜனவரி மாதம் விசாரணைக்கு வரும் என்று கூறப்படுகிறது.
