தேசியவாத காங்கிரசில் மீண்டும் பிளவு? அமித் ஷாவைச் சந்தித்த மூத்த தலைவர்கள் – சரத் பவார் அணியுடன் இணைக்கத் திட்டமா?

தேசியவாத காங்கிரஸ் கட்சியில் மீண்டும் உள்கட்சி மோதல் உருவாகியுள்ளதாகத் தகவல்கள் வெளியாகியுள்ளன.

கட்சியின் தேசிய செயல் தலைவர் பிரபுல் படேல் தலைமையில் ஆறு மூத்த தலைவர்கள் மத்திய உள்துறை அமைச்சர் அமித் ஷாவை டெல்லியில் சந்தித்துள்ளனர். இந்தச் சந்திப்பில் கட்சியின் தற்போதைய நிர்வாகம் மற்றும் தலைமைப் பொறுப்புகள் குறித்து அதிருப்தி தெரிவிக்கப்பட்டதாகத் தகவல்கள் தெரிவிக்கின்றன.

மேலும், சரத் பவார் தலைமையிலான தேசியவாத காங்கிரஸ் கட்சியுடன் இணைவது குறித்தும், இணைந்த கட்சியை தேசிய ஜனநாயகக் கூட்டணியில் இடம்பெறச் செய்வது குறித்தும் அவர்கள் ஆலோசனை முன்வைத்ததாகச் செய்திகள் தெரிவிக்கின்றன. இந்தச் சந்திப்பில் கட்சித் தலைவர் சுனேத்ரா பவார் மற்றும் பர்த் பவார் ஆகியோர் பங்கேற்கவில்லை என்பது அரசியல் வட்டாரத்தில் கூடுதல் கவனத்தைப் பெற்றுள்ளது.

கட்சியின் எதிர்கால அரசியல் நிலைப்பாடு, கூட்டணி முடிவுகள், தலைமை நிர்வாகம் ஆகியவை தொடர்பாக மூத்த தலைவர்கள் தனியாக ஆலோசனை நடத்தியிருப்பது மகாராஷ்டிர அரசியலில் புதிய விவாதத்தை ஏற்படுத்தியுள்ளது. எனினும், கட்சி இணைப்பு தொடர்பாக இதுவரை இறுதி முடிவு அல்லது அதிகாரப்பூர்வ அறிவிப்பு வெளியாகவில்லை. இந்தச் சந்திப்பின் பின்னணியில் கட்சிக்குள் புதிய அரசியல் நகர்வுகள் உருவாகுமா என்ற எதிர்பார்ப்பு எழுந்துள்ளது.