புதுடில்லி: டெல்லி தேர்தலுக்கு முதல் வேட்பாளர் பட்டியலை பாஜக வெளியிட்டுள்ளது. கெஜ்ரிவாலை எதிர்ப்பவர் யார் தெரியுங்களா?
டெல்லியில் அடுத்த மாதம் சட்டமன்றத் தேர்தல் வர உள்ள நிலையில் முதற்கட்ட வேட்பாளர் பட்டியலை பாஜக வெளியிட்டுள்ளது. ஆளும் ஆம் ஆத்மி – காங்கிரஸ் – பாஜக இடையே மும்முனை போட்டி உருவாகி உள்ள நிலையில் இந்த தேர்தல் கடும் சவால் நிறைந்ததாக அமைந்துள்ளது. 10 ஆண்டுகால ஆட்சியை தக்க வைக்கும் முயற்சியில் ஆம் ஆத்மியும், கைப்பற்றும் முயற்சியில் பாஜகவும் தீவிரம் காட்டி வருகிறது.
இந்நிலையில் டெல்லி தேர்தலில் ஆம் ஆத்மி கட்சி தலைவர் அரவிந்த் கெஜ்ரிவாலை எதிர்த்து முன்னாள் மக்களவை எம்பி பர்வேஷ் வர்மாவை பாஜக நிறுத்தியுள்ளது.
புது டெல்லி தொகுதியில் கடந்த 2013 முதல் எம்எல்ஏவாக இருக்கும் கெஜ்ரிவாலுக்கு பர்வேஷ் வர்மா இந்த முறை கடும் போட்டியை வழங்குவார் என்று எதிர்பார்க்கப்படுகிறது. பாஜக மூத்த தலைவர் ரமேஷ் பிதுரி டெல்லி முதல்வர் அதிஷியை எதிர்த்து கல்காஜியில் போட்டியிடுகிறார். இங்கு காங்கிரஸ் சார்பில் அல்கா லம்பா போட்டியிடுகிறார்.
மேலும் ஆம் ஆத்மியில் இருந்து கழன்று வந்து பாஜகவில் இணைந்த முன்னாள் அமைச்சர்கள் ராஜ் குமார் ஆனந்த் மற்றும் கைலாஷ் கெலாட் ஆகியோருக்கும் சீட்டு வழங்கப்பட்டுள்ளது.
பிஜ்வாசான் தொகுதியில் கைலாஷ் கெலாட் மற்றும் படேல் நகர் தொகுதியில் ராஜ் குமார் ஆனந்த் நிற்கின்றனர் . மேலும் ஆம் ஆத்மி கட்சியில் இருந்து பாஜகவுக்குத் தாவிய கர்தார் சிங் தன்வார் தான் எம்எல்ஏ ஆக வென்ற சத்தர்பூர் தொகுதியில் மீண்டும் போட்டியிடுகிறார்.
எம்எல்ஏ அணில் பாஜ்பயை கழற்றிவிட்டு காந்தி நகர் தொகுதியை தங்களுடன் இணைந்த டெல்லி காங்கிரஸ் முன்னாள் தலைவர் அரவிந்தர் சிங் லவ்லிக்கு ஒதுக்கியுள்ளது. 2003 முதல் 2013 வரை டெல்லியில் ஷீலா தீட்சித்தின் காங்கிரஸ் அரசில் அமைச்சராக இருந்த லவ்லி, கடந்த ஆண்டு பாஜகவில் இணைந்தார்.
