தஞ்சாவூர்: மேற்கு வங்கத்தைச் சேர்ந்த 70 வயது முதியவருக்கு இடது மூட்டில் ஏற்பட்டிருந்த கடுமையான மற்றும் நீண்ட நாளைய குறைபாடுகளை, சவாலான முழு மூட்டு மாற்று அறுவைசிகிச்சை (TKA) மூலம் தஞ்சாவூர் மீனாட்சி மருத்துவமனை வெற்றிகரமாக சரிசெய்து குணமாக்கியிருக்கிறது.
மூட்டழற்சி முற்றிய நிலையில் இருந்ததால், இடது காலில் கடுமையான வளைவு ஏற்பட்டு மூட்டு அசாதாரணமாகப் பின்னோக்கி வளைந்திருந்தது. சுமார் ஐந்து ஆண்டுகளாக இரண்டு முழங்கால் மூட்டுகளிலும் வலியாலும், நாளுக்கு நாள் அதிகரிக்கும் பாதிப்பாலும் அவதிப்பட்டு வந்த இந்த முதியவருக்கு (குறிப்பாக இடது கால் மூட்டில் பாதிப்பு அதிகம்) சீரமைப்பு அறுவைசிகிச்சை நடந்த மறுநாளே, இயன்முறை சிகிச்சை உதவியுடன் அறுவைசிகிச்சை செய்யப்பட்ட காலில் உடல் எடையைத் தாங்கி நிற்க முடிந்தது.
அவர் படிப்படியாக மூட்டுகளில் இயக்கத் திறனைத் திரும்பப் பெற்று, ஒரு மாதத்திற்குள் இயல்பாக நடக்கத் தொடங்கினார். நோயாளிக்கு கடுமையான எலும்புத் தேய்மானமும் இருந்ததால், எலும்புகள் பலவீனமடைந்து குறிப்பிடத்தக்க அளவிற்கு எலும்பு இழப்பும் தசைச் சிதைவும் ஏற்பட்டிருந்தன. இடது காலின் முழங்கால் எலும்பும் பகுதியளவு பின்னோக்கியும், மூட்டின் வெளிப்புறத்தை நோக்கியும் நகர்ந்திருந்தது. அறுவைசிகிச்சையின் போது, மூட்டைச் சுற்றியுள்ள எலும்பு வளர்ச்சிகள், தளர்வான சிதைவுகள் மற்றும் கடுமையாகச் சேதமடைந்த மூட்டுக் குருத்தெலும்புகள் உள்ளிட்ட பல சிதைவு மாற்றங்கள் இருப்பதையும் மருத்துவக் குழுவினர் கண்டறிந்தனர்.
மூட்டு மாற்று அறுவைசிகிச்சை (TKA) இடது மூட்டின் முக்கிய உருக்குலைவு குறைபாட்டை சரிசெய்தது. இந்த சிக்கலான மறுசீரமைப்பில் எலும்பு சேதத்தை சரிசெய்ய திருகு மற்றும் எலும்பு சிமெண்ட்டை பயன்படுத்தினர். மேலும், மூட்டு மாற்று உதிரிபாகத்துடன் இணைக்கப்படும் நீண்ட உலோக நீட்டிப்பான ‘டிபியல் எக்ஸ்டென்ஷன் ஸ்டெம்’மும் கூடுதல் நிலைத்தன்மையை வழங்குவதற்காகப் பொருத்தப்பட்டது.
எலும்பியல் துறை மூத்த ஆலோசகர் டாக்டர் கார்த்திகேயன் மகாராஜன், இணை ஆலோசகர்கள் டாக்டர் சண்முக ஹரிஹரன் மற்றும் டாக்டர் பாலகுருநாதன், மயக்க மருந்து நிபுணர் டாக்டர் அரி மாணிக்கம் ஆகியோரைக் கொண்ட குழுவுடன் இணைந்து, எலும்பியல் துறையின் துறைத் தலைவரும் மூத்த ஆலோசகருமான டாக்டர் கே. பார்த்திபன் இந்த அறுவை சிகிச்சையை மேற்கொண்டார். பல சிக்கலான படிநிலைகளைக் கொண்ட இந்த அறுவைசிகிச்சை, ஒரே மயக்க மருந்தளிப்பின் கீழ் சுமார் இரண்டரை மணி நேரத்தில் வெற்றிகரமாக முடிக்கப்பட்டது.
டாக்டர் பார்த்திபன் கூறுகையில், “நோயாளியின் வயது, கடுமையான எலும்புத் தேய்மானம், கணிசமான மூட்டுக் குறைபாடு மற்றும் எலும்பு சேதம் ஆகியவற்றின் காரணமாக இது ஒரு சவாலான செயல்முறையாக இருந்தது. குறைபாட்டைச் சரிசெய்தல், எலும்பு இழப்பைக் கையாளுதல் மற்றும் இரத்த இழப்பைக் கவனமாகக் கட்டுக்குள் வைத்தபடியே மூட்டு மாற்றுச் சாதனத்தை நிலையாகப் பொருத்துதல் ஆகிய சிக்கலான படிநிலைகளை இரண்டரை மணி நேரத்தில் வெற்றிகரமாக முடித்தோம். சிகிச்சைக்குப் பிறகு நோயாளி விரைவாக இயல்புநிலைக்கு திரும்பியிருப்பது ஊக்கமளித்திருக்கிறது. அறுவைசிகிச்சை நடந்த இரண்டாவது நாளிலேயே குறைந்த வலியுடன் அவரால் எழுந்து நிற்கவும் நடக்கவும் முடிந்தது சிகிச்சையின் வெற்றியை எடுத்துக்காட்டுகிறது” என்றார்.
காயம் ஏற்பட்டவுடன் தகுந்த நேரத்தில் மருத்துவ உதவியை நாட வேண்டியதன் அவசியத்தையும் மருத்துவர்கள் வலியுறுத்தினர். இந்த முதிய நோயாளிக்கு 20 ஆண்டுகளுக்கு முன்பு இடது கால் மூட்டில் காயம் ஏற்பட்டது. அதற்கு தகுந்த சிகிச்சை பெறாததால், பல ஆண்டுகளாக மூட்டின் நிலை படிப்படியாக மோசமடைந்து, இறுதியில் கடுமையான குறைபாட்டிற்கும், நடமாட்டம் பாதிக்கப்படுவதற்கும் வழிவகுத்துள்ளது என்பதை மருத்துவ நிபுணர்கள் சுட்டிக்காட்டினர்.
இந்த பத்திரிகையாளர் சந்திப்பின் போது தஞ்சாவூர் மீனாட்சி மருத்துவமனையின் துணை மருத்துவக் கண்காணிப்பாளர் டாக்டர் வி. பிரவீன் உடனிருந்தார்.
