டெல்லி: 2019 முதல் ஒரு தேர்தலில் கூட போட்டியிடாத 345 பதிவு செய்யப்பட்ட அரசியல் கட்சிகளை பட்டியலில் இருந்து நீக்க இந்திய தேர்தல் ஆணையம் முயற்சி எடுத்து வருகிறது. அதன்படி, 2019 முதல் கடந்த 6 ஆண்டுகளில் ஒரு தேர்தலில் கூட போட்டியிடாத தமிழ்நாட்டைச் சேர்ந்த 24 கட்சிகளுக்கு இந்திய தேர்தல் ஆணையம் நோட்டீஸ் அனுப்பியுள்ளது. இந்திய தேர்தல் ஆணையம் 345 பதிவு செய்யப்பட்ட அங்கீகரிக்கப்படாத அரசியல் கட்சிகளை பட்டியலில் இருந்து நீக்கும் பணியைத் தொடங்கியுள்ளது.
தேர்தல்களில் போட்டியிடாதது குறித்து சம்பந்தப்பட்ட கட்சிகள் தேர்தல் ஆணையத்திற்கு முறையான விளக்கத்தை வழங்க வேண்டும் என்றும், ஒரு மாதத்திற்குள் பதிலளிக்காத கட்சிகளை பட்டியலில் இருந்து நீக்க தலைமை தேர்தல் அதிகாரிக்கு பரிந்துரைக்க வேண்டும் என்றும் இந்திய தேர்தல் ஆணையம் உத்தரவு பிறப்பித்துள்ளது.
அதன்படி, தமிழகத்தைச் சேர்ந்த அப்பா அம்மா மக்கள் கழகம், தமிழ் மாநாயக் கட்சி, மீனவ மக்கள் முன்னணி, காமராஜர் மக்கள் கட்சி உள்ளிட்ட நாடு முழுவதும் உள்ள 24 கட்சிகளுக்கு விதிகளை பின்பற்றாததால் நோட்டீஸ் அனுப்பப்பட்டுள்ளது. தலைமைத் தேர்தல் ஆணையம் வெளியிட்டுள்ள அறிக்கையில், “தற்போது இந்தியத் தேர்தல் ஆணையத்தில் பதிவு செய்யப்பட்டுள்ள 2,800-க்கும் மேற்பட்ட அங்கீகரிக்கப்படாத அரசியல் கட்சிகளில் பல, பதிவுசெய்யப்பட்ட அங்கீகரிக்கப்படாத அரசியல் கட்சிகளாகத் தொடர்வதற்குத் தேவையான நிபந்தனைகளை பூர்த்தி செய்யவில்லை என்பது தேர்தல் ஆணையத்தின் கவனத்திற்கு வந்துள்ளது.
பதிவுசெய்யப்பட்ட அங்கீகரிக்கப்படாத அரசியல் கட்சிகள் கடந்த 6 ஆண்டுகளுக்குள் எந்தவொரு தேர்தலிலும் போட்டியிட்டிருக்க வேண்டும் என்பது கட்டாயமாகும். 2019 முதல் நாடாளுமன்றம் மற்றும் மாநில மற்றும் யூனியன் பிரதேச சட்டமன்றங்களுக்கு பொதுத் தேர்தல் அல்லது இடைத்தேர்தலில் போட்டியிடாத கட்சிகளையும், இருப்பிடத்தைக் கண்டுபிடிக்க முடியாத கட்சிகளையும் நீக்குவதன் மூலம் அரசியல் அமைப்பைச் சுத்தப்படுத்த நடவடிக்கை எடுக்கப்பட்டு வருகிறது.
முதல் கட்டத்தில், நிபந்தனைகளின்படி கடந்த 6 ஆண்டுகளில் 345 அங்கீகரிக்கப்படாத பதிவுசெய்யப்பட்ட அரசியல் கட்சிகள் எந்தத் தேர்தலிலும் போட்டியிடவில்லை என்பது கண்டறியப்பட்டுள்ளது. இந்த அரசியல் கட்சிகள் முதல் கட்டத்தில் பதிவை நீக்கியது. இந்திய தேர்தல் ஆணையத்தின் தலைவர் ஞானேஷ் குமார் மற்றும் தேர்தல் ஆணையர்கள் டாக்டர் சுக்பீர் சிங் சந்து மற்றும் டாக்டர் விவேக் ஜோஷி ஆகியோர் அடங்கிய குழுவால் பதிவை நீக்கும் செயல்முறை தொடங்கப்பட்டுள்ளது. அதே நேரத்தில், எந்தவொரு அரசியல் கட்சியும் தேவையற்ற முறையில் பட்டியலில் இருந்து நீக்கப்படவில்லை என்பதை உறுதி செய்வதற்காக, அடையாளம் காணப்பட்ட அரசியல் கட்சிகளுக்கு சம்பந்தப்பட்ட மாநிலங்கள் மற்றும் யூனியன் பிரதேசங்களின் தலைமை தேர்தல் அதிகாரிகள் மூலம் விளக்கம் கேட்டு நோட்டீஸ் அனுப்பப்படும்.
அதன் பிறகு, தலைமை தேர்தல் அதிகாரிகள் நடத்தும் விசாரணையின் போது அத்தகைய அரசியல் கட்சிகள் தங்களை விளக்கிக் கொள்ள வாய்ப்பு வழங்கப்படும். எந்தவொரு பதிவுசெய்யப்பட்ட அங்கீகாரம் பெறாத அரசியல் கட்சியையும் பட்டியலில் இருந்து நீக்குவது தொடர்பான இறுதி முடிவு இந்திய தேர்தல் ஆணையத்தால் எடுக்கப்படும். அரசியல் அமைப்பை சீர்திருத்தும் நோக்கத்துடன் இந்த செயல்முறை தொடரும்.
நாட்டில் உள்ள அரசியல் கட்சிகள் 1951-ம் ஆண்டு மக்கள் பிரதிநிதித்துவச் சட்டத்தின் பிரிவு 29A-ன் கீழ் பதிவு செய்யப்பட்டுள்ளன. இந்தப் பிரிவின் கீழ், அரசியல் கட்சிகளாகப் பதிவுசெய்யப்பட்ட அமைப்புகள் வரி விலக்குகள் போன்ற பல நன்மைகளை அனுபவிக்கின்றன என்று தெரிவிக்கப்பட்டுள்ளது.
