சென்னை திருவொற்றியூர் மேல்நகரை சேர்ந்த 10 பேர் கடந்த மாதம் 29-ம் தேதி திடீரென வாந்தி, மயக்கம் அடைந்து தண்டையார்பேட்டை அரசு மருத்துவமனையில் அனுமதிக்கப்பட்டனர். பின்னர், காலரா மருத்துவமனையில் அனுமதிக்கப்பட்டு சிகிச்சைக்குப் பின் வீடு திரும்பினர். அந்த பகுதியில் குழாய் நீரை குடித்ததால் அவர்களுக்கு உடல்நலக்குறைவு ஏற்பட்டதாக கூறப்படுகிறது.
குடிநீரில் கழிவுநீர் கலப்பதாக அப்பகுதி மக்கள் குற்றம்சாட்டினர். ஆனால், அரசு அதை மறுத்தது. இந்த சம்பவத்தில் ஸ்டான்லி மருத்துவமனையில் சிகிச்சை பெற்று வந்த 65 வயது பெண் ஒருவர் நேற்று உயிரிழந்தார். இதே புகாருடன் அப்பகுதியை சேர்ந்த மேலும் 4 பேர் நேற்று மருத்துவமனையில் அனுமதிக்கப்பட்டனர். இதேபோல் பல்லாவரம் காமராஜ் நகர், மணல்மேடு பகுதியை சேர்ந்த 19 பேர் வாந்தி, மயக்கம் அடைந்து ஒரு பெண் உள்பட 3 பேர் உயிரிழந்தனர்.
குடிநீரில் தொடர்ந்து கழிவுநீர் கலப்பதாக அப்பகுதி மக்கள் தெரிவித்தாலும், அரசு அதிகாரிகளும், அமைச்சர்களும் அதற்கு மறுப்பு தெரிவித்தனர். எனினும், இறந்தவர்களின் பிரேத பரிசோதனை அறிக்கையில், ‘புட் பாய்சன்’ அவர்கள் உயிரிழந்ததாக தெரிவிக்கப்பட்டுள்ளது. இதன் மூலம் குடிநீரின் தரம் சரியில்லை என்பது நிரூபணமாகியுள்ளது. சென்னை, மதுரை உட்பட தமிழகத்தின் பல பகுதிகளில் இதுபோன்ற சம்பவங்கள் அடிக்கடி நடக்கின்றன.
மக்களுக்கு தரமான குடிநீர் வழங்குவது தேர்ந்தெடுக்கப்பட்ட அரசின் முக்கிய கடமைகளில் ஒன்றாகும். மேலும் உள்ளாட்சி அமைப்புகள் மூலம் வினியோகிக்கப்படும் குடிநீரில் சாக்கடை நீர் கலப்பது அதிர்ச்சியளிக்கும் சம்பவம். குடிநீர் வினியோக குழாய்களில் உடைப்பு மற்றும் குடிநீர் வினியோக அமைப்பில் ஏற்பட்டுள்ள பிரச்னையால் மாசு ஏற்படுவதாக கூறப்படுகிறது. மேலும் கேன்கள் மூலம் குடிநீரை விற்கும் பழக்கம் அதிகரித்துள்ளதால், சமூக விரோத செயல்களில் ஈடுபடும் அளவுக்கு இவர்களின் லாபநோக்கம் அதிகரித்துள்ளதாகவும் கூறப்படுகிறது.
‘குடிநீர் மாஃபியாக்கள்’ என அழைக்கப்படுபவர்கள் வேண்டுமென்றே குடிநீர் குழாய்களில் சாக்கடை நீரை கலந்து அப்பகுதியில் விற்பனையை பெருக்க உத்தியாக பயன்படுத்துவதாகவும் பொதுமக்கள் குற்றம்சாட்டுகின்றனர். இந்தக் குற்றச்சாட்டை அரசு சாதாரணமாக எடுத்துக் கொள்ளக் கூடாது. தவறு செய்பவர்களை கண்டறிந்து சட்டப்படி கடுமையாக தண்டிக்க வேண்டும். அதுமட்டுமின்றி மக்களுக்கு விநியோகிக்கப்படும் குடிநீரின் தரத்தை உறுதி செய்வது அரசின் கடமை.
மத்திய மாசுக்கட்டுப்பாட்டு வாரிய விதிமுறைகளின்படி, 100 மில்லி குடிநீரில் கோலிஃபார்ம் பாக்டீரியா எண்ணிக்கை 5000 அல்லது அதற்கும் குறைவாக இருக்க வேண்டும். குடிநீரின் pH அளவு 6 முதல் 9 வரை இருக்க வேண்டும். கரைந்த ஆக்ஸிஜன் அளவு லிட்டருக்கு 4 மி.கி அல்லது அதற்கும் அதிகமாக இருக்க வேண்டும். தமிழகம் முழுவதும் குடிநீரின் தரத்தை பரிசோதித்து, இந்த தரத்தில் குடிநீர் விநியோகம் செய்யப்படுவதை அரசு உறுதி செய்ய வேண்டும். அப்போதுதான் மக்கள் நலன் காக்கும் அரசாக ஆளும் அரசை ஏற்க முடியும்.
