சென்னை: சென்னையில் தினசரி மற்றும் எப்போதாவது பயணம் செய்பவர்கள் சில நேரங்களில் பேருந்து, மெட்ரோ மற்றும் ரயில் ஆகிய 3 வகையான போக்குவரத்து சேவைகளையும் பயன்படுத்த வேண்டியுள்ளது. இந்நிலையில், ஒரே பயண அட்டையில் மாநகர பேருந்துகள், புறநகர் ரயில்கள், மெட்ரோ ரயில்கள் போன்றவற்றில் மக்கள் பயணம் செய்யும் வகையில் பொது இயக்க அட்டை திட்டத்தை அமல்படுத்த திட்டமிடப்பட்டது. இதன் மூலம் தினமும் பயணம் செய்பவர்கள் ஒவ்வொரு முறையும் வரிசையில் நின்று டிக்கெட் வாங்க வேண்டியதில்லை. இத்திட்டத்தை செயல்படுத்த, சென்னை ஒருங்கிணைந்த போக்குவரத்துக் கழகம், சென்னை பெருநகர வளர்ச்சிக் கழகம், மாநகரப் போக்குவரத்துக் கழகம், சென்னை மெட்ரோ ரயில் நிர்வாகம் உள்ளிட்ட பல அரசுத் துறைகள் பல்வேறு ஆலோசனைகளை நடத்தின.
இந்நிலையில், சென்னை மெட்ரோ ரயில் நிறுவனம், முதன்முறையாக, 2023-ல், சிங்கார சென்னை கார்டு என்ற பெயரில், தேசிய பொது இயக்க அட்டையை அறிமுகம் செய்தது.இதை தொடர்ந்து, சென்னை மாநகர போக்குவரத்து கழகம், கடந்த, 6-ம் தேதி கார்டை அறிமுகப்படுத்தியது. மாநகரப் பேருந்துகள், மெட்ரோ ரயில்கள் உள்ளிட்ட பல போக்குவரத்துப் பரிவர்த்தனைகளுக்கு இந்த அட்டையைப் பயன்படுத்தலாம் என்று தெரிவிக்கப்பட்டது. இந்த சிங்கார சென்னை கார்டு உட்பட கிரெடிட், டெபிட் கார்டு மற்றும் யுபிஐ மூலம் டிக்கெட்டுகளை செலுத்தவும், வாங்கவும் மாநகர பேருந்துகளில் மின்னணு டிக்கெட் இயந்திரம் கடந்த ஆண்டு அறிமுகப்படுத்தப்பட்டது. இதன் மூலம் பஸ்களில் நிலவும் சில்லரை பிரச்னைக்கு தீர்வு கிடைத்துள்ளது.
இந்நிலையில், சிங்கார சென்னை பயண அட்டைக்கு பொதுமக்களிடம் பெரும் வரவேற்பு கிடைத்துள்ள நிலையில், இதுவரை 23,000 சிங்கார சென்னை பயண அட்டைகள் விற்பனையாகியுள்ளன. அறிமுகம் செய்யப்பட்ட முதல் மாதத்தில் ₹40 லட்சம் பரிவர்த்தனை நடந்துள்ளதாக போக்குவரத்து துறை அதிகாரிகள் தெரிவித்தனர். இதுகுறித்து போக்குவரத்து துறை அதிகாரிகள் கூறியதாவது:- சென்னையில் மின்சார ரயில்கள், மெட்ரோ ரயில்கள் மற்றும் நகரப் பேருந்துகளில் பயணம் செய்வதற்கான ஒரே பயணத் திட்டமாக சிங்கார சென்னை பயண அட்டை ஜனவரி 6ஆம் தேதி அறிமுகப்படுத்தப்பட்டது.
முதற்கட்டமாக பிராட்வே, சென்ட்ரல், தாம்பரம், கோயம்பேடு, திருவான்மியூர் உள்ளிட்ட 20 இடங்களில் 50,000 கார்டுகள் இலவசமாக விநியோகிக்கப்படுகின்றன. இதன் மூலம் பஸ் கண்டக்டர்களுக்கு எந்த பிரச்னையும் இல்லை, பண பரிவர்த்தனை செய்வதும் எளிதாகிவிட்டது. இந்நிலையில், இதுவரை 23,000 சிங்கார சென்னை பயண அட்டைகள் விற்பனை செய்யப்பட்டுள்ளதாக போக்குவரத்து துறை அதிகாரிகள் தெரிவித்துள்ளனர். இந்த கார்டை பயன்படுத்தி இதுவரை ₹40 லட்சம் வரை பணப்பரிவர்த்தனை செய்யப்பட்டுள்ளது. இதில், 60 சதவீதத்துக்கும் அதிகமான பயணிகள், எம்டிசி பஸ் சேவைக்கு பயன்படுத்துகின்றனர். தற்போது 3,900 பேருந்துகளில் இந்த அட்டையைப் பயன்படுத்தி பயணச்சீட்டு வழங்க மின்னணு இயந்திரங்கள் பயன்பாட்டில் உள்ளன. இந்த கார்டை ஃபோன் ரீசார்ஜ் செய்வது போலவே GPay மற்றும் PhonePay மூலம் ₹100 முதல் ₹2000 வரை ரீசார்ஜ் செய்யலாம்.
