பாரீஸ்: ரஷ்யா – உக்ரைன் இடையிலான போரை முடிவுக்குக் கொண்டுவரும் முயற்சியில் அமெரிக்கா முன்னெடுத்து வரும் அமைதிப் பேச்சுவார்த்தையில் ஐரோப்பிய நாடுகளும் பங்கேற்க உள்ளதாக பிரான்ஸ் வெளியுறவுத்துறை அமைச்சர் ஜீன்-நோயல் பாரோ தெரிவித்துள்ளார்.
அபுதாபியில் அடுத்த வாரம் நடைபெற உள்ள பேச்சுவார்த்தையில் ஐரோப்பிய நாடுகளின் பிரதிநிதிகளும் கலந்து கொள்வார்கள் என அவர் கூறியுள்ளார். உக்ரைன் போர் தொடங்கியதில் இருந்து பல்வேறு கட்டங்களில் அமைதி முயற்சிகள் மேற்கொள்ளப்பட்டு வந்தாலும், இரு நாடுகளுக்கும் இடையே முக்கியமான பிரச்சினைகளில் இதுவரை ஒருமித்த கருத்து ஏற்படவில்லை.
ரஷ்யாவின் ராணுவ நடவடிக்கைகள், உக்ரைனின் பிராந்திய ஒருமைப்பாடு, பாதுகாப்பு உத்தரவாதங்கள் மற்றும் எதிர்கால எல்லைப் பிரச்சினைகள் ஆகியவை பேச்சுவார்த்தையில் முக்கிய இடம் பெறும் என எதிர்பார்க்கப்படுகிறது.
அமெரிக்கா தலைமையில் நடைபெறும் பேச்சுவார்த்தையில் ஐரோப்பிய நாடுகளின் பங்கேற்பு முக்கியத்துவம் வாய்ந்ததாகக் கருதப்படுகிறது. ஏனெனில் உக்ரைனுக்கு பொருளாதார மற்றும் ராணுவ உதவிகளை வழங்கி வரும் ஐரோப்பிய நாடுகள், போர் முடிவுக்கு வந்த பிறகான பாதுகாப்பு ஏற்பாடுகளிலும் முக்கியப் பங்கு வகிக்க வேண்டிய சூழல் உள்ளது.
இதற்கிடையே, ரஷ்யா மற்றும் உக்ரைன் இடையிலான மோதல்கள் தொடர்ந்து நீடித்து வருகின்றன. இரு தரப்பினரும் தங்களது நிலைப்பாடுகளில் உறுதியாக இருப்பதால் பேச்சுவார்த்தை எளிதாக முடிவுக்கு வருமா என்ற கேள்வியும் எழுந்துள்ளது.
அபுதாபியில் நடைபெற உள்ள இந்த ஆலோசனை, போரை முடிவுக்குக் கொண்டுவருவதற்கான புதிய வாய்ப்பை ஏற்படுத்துமா என்ற எதிர்பார்ப்பு சர்வதேச நாடுகளிடையே உருவாகியுள்ளது.
