வாஷிங்டன்: அமெரிக்க அரசின் நிர்வாக பிரிவு தலைவராக தொழிலதிபர் எலோன் மஸ்க்கை டிரம்ப் நியமித்தார். டிரம்ப் தனது பரிந்துரையின் பேரில் இந்த பணிநீக்கத்தை தொடங்கியுள்ளார். அமெரிக்க அதிபராக டிரம்ப் பதவியேற்றதில் இருந்து பல்வேறு நிர்வாக நடவடிக்கைகளை மேற்கொண்டு வருகிறார். அதில் ஒன்று மத்திய அரசு ஊழியர்களை பணிநீக்கம் செய்யும் உத்தரவு. அமெரிக்க அரசாங்கத் துறைகளில் 20 மில்லியனுக்கும் அதிகமான ஊழியர்கள் உள்ளனர். அவர்களில் பலர் திறமையற்றவர்கள் மற்றும் தனக்கு எதிராக செயல்படுவதாகக் கூறி, பணிநீக்கங்களைச் செய்வதாக அதிபர் டிரம்ப் அறிவித்தார். இது அரசு ஊழியர்கள் மத்தியில் கடும் அதிருப்தியை ஏற்படுத்தியுள்ளது.
இருப்பினும், அதிபர் டிரம்ப் அவர்கள் மீது கவனம் செலுத்துவதாக தெரியவில்லை. பணிநீக்கத்திற்கு தயாராகுமாறு அரசு நிறுவனங்களுக்கு உத்தரவிட்டார். அதன்படி தற்போது 9,500-க்கும் மேற்பட்ட ஊழியர்களை பணிநீக்கம் செய்து டிரம்ப் உத்தரவு பிறப்பித்துள்ளார். உள்துறை, எரிசக்தித் துறை, ஓய்வூதியத் துறை, வேளாண்மைத் துறை, சுகாதாரத் துறை, சேவைத் துறை என பல்வேறு துறைகளில் பணிநீக்கங்கள் நடந்துள்ளன. சில நிறுவனங்களில் 70% பணியாளர்கள் பணிநீக்கம் செய்யப்படலாம் என மதிப்பிடப்பட்டுள்ளது.
பணிநீக்கம் செய்யப்பட்டவர்களில் பெரும்பாலானோர், ஒரு வருடம் கூட பணியை முடிக்காமல், ‘தகுதி காலத்தில்’ இருப்பவர்கள். மேலும், ஒப்பந்த ஊழியர்களான இவர்கள் பணி பாதுகாப்பு இல்லாதவர்கள். முன்னதாக திறமையற்ற துறைகளில் உள்ளவர்கள் தாமாக முன்வந்து ராஜினாமா செய்தால் பல்வேறு சலுகைகள் வழங்கப்படும் என டிரம்ப் அறிவித்ததாகவும், அதற்கு ஆயிரக்கணக்கானோர் சம்மதித்ததாகவும் செய்திகள் வெளியாகின. பணிநீக்கம் செய்யப்படும் ஊழியர்களுக்கு இந்த ஆண்டு அக்டோபர் மாதம் வரை பணியின்றி ஊதியம் வழங்கப்படும் என டிரம்ப் அறிவித்தார்.
75,000-க்கும் மேற்பட்ட ஊழியர்கள் ராஜினாமா செய்ய ஒப்புக்கொண்டுள்ளனர். ஆனால், செலவு தொடர்பான பட்ஜெட் ஒதுக்கீடுகள் மார்ச் 14-ம் தேதியுடன் முடிவடைவதால், பணிநீக்கம் செய்யப்படும் ஊழியர்களுக்கு, அதன்பிறகு அறிவிக்கப்பட்ட ஊதியம் வழங்கப்படும் என, உத்தரவாதம் இல்லை என, தொழிற்சங்கங்கள், ஊழியர்கள் மத்தியில் தீவிர பிரசாரம் செய்கின்றனர். ஆனால் டிரம்ப் எதிர்ப்புகள், போராட்டங்கள், பிரச்சாரங்கள் அனைத்தையும் புறக்கணித்துவிட்டு பணிநீக்க நடவடிக்கையை தொடங்கியுள்ளார்.
மத்திய அரசு கடனில் சிக்கித் தவிப்பதாக கூறியுள்ள டிரம்ப், தேவையில்லாத பதவிகளுக்காக அதிக பணத்தை வீணடிப்பதால், நஷ்டம் ஏற்பட்டுள்ளதாகவும், இந்த ஆட்குறைப்பு நடவடிக்கை அவசியம் என்றும் கூறியுள்ளார்.
