கீவ்: உக்ரைன் மற்றும் ரஷ்யா இடையே அமெரிக்காவின் மத்தியஸ்தத்தில் மேற்கொள்ளப்பட்ட ஆறு நாள் தற்காலிக மனிதாபிமான போர் நிறுத்தம் முடிவுக்கு வந்துள்ளது. இதன் மூலம் உக்ரைனின் தெற்குப் பகுதியில் சிக்கியிருந்த பொதுமக்களை வெளியேற்றுவதற்கான நடவடிக்கை நிறைவடைந்துள்ளது.
கெர்சான் மாகாணத்தின் ரஷ்யக் கட்டுப்பாட்டில் உள்ள ஒலேஷ்கி பகுதியில் அக்டோபர் 27-ம் தேதி முதல் தற்காலிக போர் நிறுத்தம் அமல்படுத்தப்பட்டது. இந்த ஏற்பாட்டின் மூலம் அப்பகுதியில் சிக்கியிருந்த பொதுமக்களைப் பாதுகாப்பாக வெளியேற்றுவதற்கான வாய்ப்பு உருவானது.
அமெரிக்காவின் முதல் பெண்மணி மெலானியா டிரம்ப் இந்த மனிதாபிமான முயற்சிக்கு உதவியதாக வெள்ளை மாளிகை தெரிவித்துள்ளது. இந்த நடவடிக்கையின் மூலம் சுமார் 800 பேர் வெளியேற்றப்பட்டதாகத் தகவல்கள் தெரிவிக்கின்றன.
ஆனால் போர் நிறுத்தத்தை ரஷ்யா பயன்படுத்தி தனது ராணுவப் படைகளை மாற்றியமைத்ததாக உக்ரைன் குற்றம்சாட்டியுள்ளது. பாதுகாப்பு நிலைகளை வலுப்படுத்தவும், ராணுவப் பொருட்களை நகர்த்தவும் ரஷ்யா இந்த இடைவெளியைப் பயன்படுத்தியதாக உக்ரைன் தரப்பில் தெரிவிக்கப்பட்டுள்ளது.
இந்தக் குற்றச்சாட்டை ரஷ்யா உறுதிப்படுத்தவில்லை. போர் நிறுத்த காலத்தில் இரு தரப்பினரும் தங்களது படைகளை மறுசீரமைக்க வாய்ப்பு இருப்பதாக ரஷ்ய அதிபர் மாளிகை செய்தித் தொடர்பாளர் டிமிட்ரி பெஸ்கோவ் குறிப்பிட்டுள்ளார்.
இதற்கிடையே, போர் நிறுத்தம் முடிவடைந்த பின்னரும் கெர்சான் பகுதியில் தாக்குதல்கள் நடைபெற்றதாகத் தகவல்கள் வெளியாகியுள்ளன. உக்ரைனின் கட்டுப்பாட்டில் உள்ள குடியிருப்புப் பகுதிகள் மீது ரஷ்யா தாக்குதல் நடத்தியதாகவும், ட்ரோன் தாக்குதல்களில் உயிரிழப்புகள் ஏற்பட்டதாகவும் செய்திகள் தெரிவிக்கின்றன.
இந்தத் தற்காலிக ஏற்பாடு பொதுமக்களை வெளியேற்ற உதவியிருந்தாலும், இரு நாடுகளுக்கும் இடையிலான பெரிய அளவிலான போரை முடிவுக்குக் கொண்டுவரும் அமைதி முயற்சியாக இது மாறவில்லை.
