பல்கேரியா நாட்டின் கருங்கடல் கடல் எல்லைப் பகுதியில் கோதுமை ஏற்றிச் சென்ற சரக்குக் கப்பல் கடலில் மூழ்கிய சம்பவம் பரபரப்பை ஏற்படுத்தியுள்ளது. இந்தக் கப்பல் ஆளில்லா கடல் ட்ரோன் தாக்குதலுக்கு உள்ளானதாகக் கூறப்படுகிறது. கப்பலில் இருந்த 12 பணியாளர்களும் உயிருடன் மீட்கப்பட்டுள்ளனர். இதனால் பெரும் உயிரிழப்பு தவிர்க்கப்பட்டுள்ளது.
சோமாலிய நாட்டுக் கொடியுடன் பயணித்த பெட்டுல் 8 என்ற சரக்குக் கப்பலில் 3,000 மெட்ரிக் டன் கோதுமை ஏற்றப்பட்டிருந்தது. ருமேனியாவில் இருந்து எகிப்து நோக்கிச் சென்று கொண்டிருந்த இந்தக் கப்பல், பல்கேரியாவின் கேப் கலியாக்ரா கடல் பகுதியில் இருந்து சுமார் 40 கடல் மைல் தொலைவில் ஆபத்தில் சிக்கியது. இதையடுத்து மீட்புப் பணிகளுக்கு பல்கேரிய அதிகாரிகள் ஏற்பாடு செய்தனர்.
கப்பலில் இருந்த 12 பேரில் எட்டு பேர் துருக்கி நாட்டைச் சேர்ந்தவர்கள் என்றும், நான்கு பேர் அஜர்பைஜான் நாட்டைச் சேர்ந்தவர்கள் என்றும் தெரிவிக்கப்பட்டுள்ளது. பல்கேரியா, ருமேனியா மற்றும் துருக்கி நாடுகளின் மீட்புக் கப்பல்கள் இணைந்து மேற்கொண்ட நடவடிக்கையில் அனைவரும் பாதுகாப்பாக மீட்கப்பட்டனர். கப்பல் கடலில் மூழ்கியதற்கான காரணம் குறித்து அதிகாரிகள் விசாரணை நடத்தி வருகின்றனர்.
கப்பலில் இருந்தவர்கள் ஆளில்லா கடல் ட்ரோன்கள் தாக்கியதாகத் தெரிவித்துள்ளனர். இருப்பினும், தாக்குதலுக்குப் பின்னால் எந்த நாடு அல்லது அமைப்பு உள்ளது என்பது உறுதிப்படுத்தப்படவில்லை. ரஷ்யா – உக்ரைன் போர் காரணமாக கருங்கடல் பகுதியில் சரக்குக் கப்பல்களுக்கு ஏற்படும் அச்சுறுத்தல்கள் அதிகரித்துள்ள நிலையில், இந்தச் சம்பவம் சர்வதேச கடல் போக்குவரத்து பாதுகாப்பு குறித்த கவலையை மீண்டும் எழுப்பியுள்ளது.
