புதுடெல்லி: டெல்லியில் கடந்த சில நாட்களாக காற்று மாசு அதிகரித்து வருவதை அடுத்து காற்று தர மேலாண்மை ஆணையம் (CAQM) பல்வேறு கட்டுப்பாடுகளை அறிவித்துள்ளது. இந்த கட்டுப்பாடுகள் இன்று காலை 8 மணி முதல் அமலுக்கு வந்துள்ளது. அதன்படி டெல்லியில் கட்டுமான பணிகளுக்கு முழு தடை விதிக்கப்பட்டுள்ளது.
கட்டிடங்களை இடிப்பதும் தடை செய்யப்பட்டுள்ளது. அதே நேரத்தில், அரசின் முக்கிய கட்டுமானப் பணிகளுக்கு தடையில் இருந்து விலக்கு அளிக்கப்பட்டுள்ளது. மேலும், பெட்ரோலில் இயங்கும் BS-III (Bharat Stage-III) 4-சக்கர வாகனங்களும், டீசலில் இயங்கும் BS-IV 4-சக்கர வாகனங்களும் தேசிய தலைநகர் மண்டலம் (NCR) மற்றும் அதை ஒட்டிய மாவட்டங்களில் தடை செய்யப்பட்டுள்ளன. அத்தியாவசியப் பொருட்களை எடுத்துச் செல்லும் அல்லது அத்தியாவசிய சேவைகளை வழங்குவதைத் தவிர, BS-III வகை 4-சக்கர வாகனங்களை வெளியில் இருந்து நுழைய அனுமதிக்கக் கூடாது என்றும் காற்றுத் தர மேலாண்மை ஆணையம் டெல்லி அரசுக்கு உத்தரவிட்டுள்ளது.
டெல்லி மட்டுமின்றி, அதனை ஒட்டியுள்ள என்சிஆர் மாவட்டங்களான குருகிராம், ஃபரிதாபாத், காசியாபாத், கவுதம் புத் நகர் ஆகிய பகுதிகளிலும் இதுபோன்ற மாசு ஏற்படுத்தும் நான்கு சக்கர வாகனங்கள் இயக்க தடை விதிக்கப்பட்டுள்ளது. மின்சார, சிஎன்ஜி மற்றும் டீசலில் இயங்கும் பிஎஸ்-6 வாகனங்கள் தவிர, அண்டை மாநிலங்களில் இருந்து வரும் பேருந்துகளும் டெல்லிக்குள் நுழைய தடை விதிக்கப்பட்டுள்ளது.
காற்று மாசுபாட்டைக் குறைக்க எடுக்கப்பட்ட பல்வேறு அவசர நடவடிக்கைகளில் குறிப்பிடத்தக்க நடவடிக்கையாக இந்த நடவடிக்கை அமல்படுத்தப்பட்டுள்ளது. டெல்லியின் ஒட்டுமொத்த 24 மணி நேர சராசரி காற்றின் தரக் குறியீடு (AQI) நேற்று மாலை 4 மணியளவில் 424 (கடுமையானது) ஆக இருந்ததால் இந்த நடவடிக்கை எடுக்கப்பட்டுள்ளது என்று மத்திய மாசுக் கட்டுப்பாட்டு வாரியம் தெரிவித்துள்ளது. நேற்று முன் தினம் இந்த குறியீடு 418 ஆக இருந்தது.
ஐந்தாம் வகுப்பு வரையிலான குழந்தைகளுக்கான பள்ளிகளில் உடற்கல்வி வகுப்புகளை நிறுத்தவும், ஆன்லைன் கற்பித்தல் முறைக்கு மாறவும் முடிவு செய்யுமாறு டெல்லி மற்றும் பிற மாநிலங்களை காற்றின் தர மேலாண்மை ஆணையம் (CAQM) கேட்டுக் கொண்டுள்ளது. இதனிடையே, இந்த விவகாரம் குறித்து செய்தியாளர்களிடம் பேசிய டெல்லி யூனியன் பிரதேச சுற்றுச்சூழல் அமைச்சர் கோபால் ராய், “மாசு பிரச்னைக்கு டெல்லி மக்கள் மட்டும் காரணமல்ல, என்சிஆர் மாநிலங்களும் பக்கத்து மாநிலங்களும் இதற்கு சமமாக பொறுப்பேற்க வேண்டும்.
டெல்லியின் காற்று மாசு அளவைக் குறைக்க உத்தரப் பிரதேசம், ஹரியானா, ராஜஸ்தான் மற்றும் மத்திய அரசு இணைந்து செயல்பட வேண்டும்” என்றார். அவர் கூறினார். இதற்கு பதிலளித்த டெல்லி பாஜக தலைவர் வீரேந்திர சச்தேவா, “ஆம் ஆத்மி அரசின் செயலற்ற தன்மையாலும், பஞ்சாபில் குப்பைகளை எரிப்பதாலும் டெல்லியில் மாசு அளவு மோசமாகி வருகிறது” என்றார்.
