கோவை: விண்வெளியில் இரண்டு செயற்கைக்கோள்களை இணைப்பது விண்வெளி ஆராய்ச்சி மையம் அமைக்க உதவும் என இஸ்ரோ குழுவில் உள்ள கோவை விஞ்ஞானி தெரிவித்துள்ளார். இஸ்ரோ தனது திருப்புமுனை திட்டங்களில் ஒன்றான விண்வெளியில் இரண்டு செயற்கைக்கோள்களை இணைக்கும் முயற்சியை மேற்கொண்டுள்ளது. ஸ்பேடெக்ஸ் ஏ மற்றும் ஸ்பேடெக்ஸ் பி ஆகிய இரண்டு விண்கலங்கள் வடிவமைக்கப்பட்ட நிலையில், கடந்த டிசம்பரில் ஹரித்வாரில் இருந்து பிஎஸ்எல்வி சி-60 ராக்கெட் மூலம் ஏவப்பட்டது.
கடந்த வாரம் இரண்டு செயற்கைக்கோள்களையும் இணைக்கும் முயற்சி மேற்கொள்ளப்பட்டது. ஆனால், சில தொழில்நுட்ப காரணங்களால் தாமதமானது. இதனிடையே, விண்வெளியில் இரண்டு செயற்கைக்கோள்களை இணைக்கும் நடவடிக்கை வெற்றி பெற்றுள்ளதாக இஸ்ரோ அறிவித்துள்ளது. 220 கிலோ எடையுள்ள இரண்டு செயற்கைக்கோள்களை இணைக்கும் சோதனை கடந்த ஜனவரி 16-ம் தேதி நிறைவடைந்ததாக இஸ்ரோ அறிவித்துள்ளது.
இஸ்ரோவின் இந்த சாதனையில் கோவையைச் சேர்ந்த விஞ்ஞானி பிரபு (40) அடங்குவார். இவர் கோவை மணியக்காரம்பாளையத்தை சேர்ந்தவர். இந்த திட்டத்தின் துணை இயக்குனராக பணியாற்றியவர். இவரது தந்தை சின்னராஜ் சிறு வியாபாரி. அவர் தற்போது ஓய்வு பெற்றுள்ளார். இவரது தாயார் பெயர் குமுதம். இந்த தம்பதியின் ஒரே மகன் விஞ்ஞானி பிரபு. கோவை சங்கனூர் எல்சி பள்ளியில் மேல்நிலைப் படித்தார். பின்னர், சென்னையில் பொறியியல் படித்தார். அதன்பிறகு, சென்னை எம்ஐடியில் விண்வெளி தொழில்நுட்பத்தில் எம்.இ. மேற்படிப்பு படித்தார்.
அதன்பின், 2011-ல் இஸ்ரோவில் விண்வெளி விஞ்ஞானியாக சேர்ந்தார். இந்த சாதனை குறித்து விஞ்ஞானி பிரபு ‘தினகரன்’ நிருபரிடம் கூறியதாவது:- பெங்களூரில் மனைவி, மகளுடன் வசிக்கிறேன். எனது பெற்றோர் கோவையில் உள்ளனர். நான் கடந்த 14 ஆண்டுகளாக இஸ்ரோவில் பணியாற்றி வருகிறேன். இஸ்ரோவில் பல துணை திட்ட இயக்குநர்கள் பணிபுரிகின்றனர். அவர்களில் நானும் ஒருவன். குறிப்பாக, விண்வெளியில் செயற்கைக்கோள் ஏவுதல் திட்டத்தில் துணை இயக்குநராக பணியாற்றியிருப்பது மிகுந்த மகிழ்ச்சி அளிக்கிறது.
14 வருட காத்திருப்புக்குப் பிறகு இந்த வெற்றி எங்களுக்கு அங்கீகாரத்தை அளித்துள்ளது. நம் வேலையை திறம்பட செய்தால் நிச்சயம் ஒரு நாள் வெற்றி பெறுவோம். அதற்கு இந்த திட்டம் ஒரு சிறந்த உதாரணம். இத்திட்டத்தின் வெற்றி, அடுத்த கட்டமாக இஸ்ரோவுக்கு பெரும் உதவியாக இருக்கும். குறிப்பாக, 2035-ல் இந்தியா சார்பில் விண்வெளி ஆராய்ச்சி மையம் அமைக்கும் திட்டம், நிலவுக்கு மனிதனை அனுப்பும் திட்டம், சந்திரயான்-4 திட்டம் உள்ளிட்ட எதிர்கால திட்டங்களுக்கு இது பெரிதும் உதவியாக இருக்கும். இஸ்ரோவின் அடுத்தடுத்த வெற்றிக்கான முதல் படி இதுவாகும். இவ்வாறு விஞ்ஞானி பிரபு கூறினார்.
