திருவனந்தபுரம்: சபரிமலைக்கு பக்தர்கள் கட்டுக்கடங்காமல் குவிந்து வருகின்றனர். கடந்த இரண்டு நாட்களில் மட்டும் 1.80 லட்சத்துக்கும் அதிகமான பக்தர்கள் தரிசனம் செய்துள்ளனர். இந்த ஆண்டு மண்டல கால பூஜைகளுக்காக சபரிமலை நடை திறக்கப்பட்டு 23 நாட்கள் ஆகிறது.
நவம்பர் 15-ம் தேதி மாலை 4 மணிக்கு கோவில் நடை திறக்கப்பட்டது.அதிலிருந்து தொடர்ந்து பக்தர்கள் கூட்டம் அலைமோதுகிறது. சபரிமலைக்கு தினமும் சராசரியாக 70 ஆயிரத்துக்கும் மேற்பட்ட பக்தர்கள் வருகின்றனர். ஆன்லைனில் தினமும் 70 ஆயிரம் பக்தர்களும், உடனடி முன்பதிவு மூலம் 10 ஆயிரம் பக்தர்களும் மட்டுமே அனுமதிக்கப்படுவார்கள் என அறிவிக்கப்பட்டிருந்தும், பக்தர்கள் அதிக அளவில் குவிந்து வருகின்றனர்.
இதுவரை 5 நாட்களில் 80 ஆயிரத்துக்கும் மேற்பட்ட பக்தர்கள் தரிசனம் செய்துள்ளனர். இந்நிலையில் நேற்று முன்தினம் பக்தர்கள் வருகை மேலும் அதிகரித்தது. அன்று அதிகப்பட்சமாக 89,840 பேர் பார்வையிட்டனர். உடனடி முன்பதிவு மூலம் 17,425 பேர் பார்வையிட்டனர். உடனடி முன்பதிவுக்கு அதிகபட்சமாக 10 ஆயிரம் பேர் மட்டுமே அனுமதிக்கப்படுவர் என அறிவிக்கப்பட்டது குறிப்பிடத்தக்கது.
நேற்று சனிக்கிழமை என்பதால் பக்தர்கள் கூட்டம் மேலும் அதிகரித்தது. அதிகாலை 3 மணிக்கு கோவில் நடை திறக்கப்பட்டதும் சரங்குத்தி வரை பக்தர்கள் வரிசையாக காணப்பட்டனர். நேற்று, 90 ஆயிரத்துக்கும் மேற்பட்டோர் பார்வையிட்டனர். சபரிமலைக்கு கடந்த 2 நாட்களில் மட்டும் 1.80 லட்சத்திற்கும் மேற்பட்ட பக்தர்கள் வருகை தந்துள்ளனர் என்பது குறிப்பிடத்தக்கது.
