நடிகர் தனுஷின் 56-வது திரைப்படமான ‘டி56’ 2027-ம் ஆண்டு கோடை காலத்தில் திரைக்கு வரும் என படக்குழு அறிவித்துள்ளது. தமிழரசன் பச்சமுத்து இயக்கும் இப்படத்தின் படப்பிடிப்பு பூஜையுடன் தொடங்கியுள்ளது.
மாரநாடு கருப்பணசாமி கோவிலில் பூஜை
சிவகங்கை மாவட்டம் திருப்பத்தூர் அருகே உள்ள மாரநாடு கருப்பணசாமி கோவிலில் செப்டம்பர் 25-ம் தேதி படத்தின் பூஜை நடைபெற்றது.
இதில் தனுஷ், இயக்குநர் தமிழரசன் பச்சமுத்து, எஸ்.ஜே.சூர்யா, பிரீத்தி முகுந்தன், வடிவேலு, இசையமைப்பாளர் சாய் அபயங்கர் உள்ளிட்டோர் பங்கேற்றனர்.
பூஜையின்போது நடிகர் தனுஷ், கோவில் தெய்வத்திற்கு 18 அடி நீள அரிவாளை காணிக்கையாக வழங்கியதாக தகவல்கள் வெளியாகியுள்ளன.
தனுஷை சூழ்ந்த ரசிகர்கள்
படத்தின் பூஜை நிகழ்ச்சிக்கு ரசிகர்கள் அதிகளவில் திரண்டனர். தனுஷை காண ரசிகர்கள் குவிந்ததால், பூஜை நிகழ்ச்சியே மாநாடு போல் காட்சியளித்ததாக நடிகர் வடிவேலு குறிப்பிட்டார்.
மதுரையை பின்னணியாகக் கொண்டு உருவாகும் இப்படத்தில் தனுஷுடன் எஸ்.ஜே.சூர்யா, பிரீத்தி முகுந்தன், வடிவேலு உள்ளிட்டோர் நடிக்கின்றனர். சாய் அபயங்கர் இசையமைக்கிறார்.
சித்தாரா என்டர்டெயின்மென்ட்ஸ் மற்றும் பிரைமார்க் புரொடக்ஷன்ஸ் இணைந்து தயாரிக்கும் ‘டி56’, 2027 கோடை வெளியீடாக வெளியாகும் என அறிவிக்கப்பட்டுள்ளது.
