காளான் விரும்பி சாப்பிடுபவர்களுக்கு சுவையான காளான் மசாலா சிறந்த உணவாக இருக்கும். சப்பாத்தி, பூரி, தோசை, சாதம் எனப் பல உணவுகளுடன் இதனைச் சேர்த்து சாப்பிடலாம்.
தேவையான பொருட்கள்: காளான் 200 கிராம், பெரிய வெங்காயம் 2, தக்காளி 2, இஞ்சி பூண்டு விழுது ஒரு தேக்கரண்டி, மிளகாய்த்தூள் ஒரு தேக்கரண்டி, மல்லித்தூள் 2 தேக்கரண்டி, கரம் மசாலா அரை தேக்கரண்டி, உப்பு, எண்ணெய்.
செய்முறை: வாணலியில் எண்ணெய் ஊற்றி வெங்காயம் வதக்கவும். இஞ்சி பூண்டு விழுது சேர்த்து பச்சை வாசனை போகும் வரை வதக்கி தக்காளி சேர்க்கவும். பின்னர் மசாலா தூள்களைச் சேர்த்து நன்கு கிளறவும்.
சுத்தம் செய்து நறுக்கிய காளானைச் சேர்த்து சிறிதளவு தண்ணீர் ஊற்றி வேகவிடவும். காளான் வெந்ததும் மசாலா கெட்டியாகும் வரை கொதிக்கவிட்டு கொத்தமல்லித்தழை தூவி இறக்கினால் சுவையான காளான் மசாலா தயார்.
