சபரிமலை தங்கம் திருட்டு வழக்கில் கைதானவருக்கு நீதிமன்ற காவல்

திருவனந்தபுரம்: சபரிமலை தங்கம் திருட்டு வழக்கில் கைதானவருக்கு 12-ந் தேதி வரை காவலில் வைக்க உத்தரவிடப்பட்டுள்ளது.

சபரிமலை கோவில் தங்கம் திருட்டு வழக்கை கேரள ஐகோர்ட் உத்தரவுப்படி சிறப்பு புலனாய்வு குழு விசாரித்து வருகிறது. இந்தக்குழு வழக்கு தொடர்பாக பலரை கைது செய்துள்ளது. இந்த நிலையில் நேற்று தேவசம்போர்டு முன்னாள் உறுப்பினர் விஜயகுமாரை கைது செய்தது. முன்னாள் தலைவர் பத்மகுமாருடன் சேர்ந்து சதி செய்து ஆவணங்களை திருடியதாக அவர் கைது செய்யப்பட்டார்.

பின்னர் கோர்ட்டில் ஆஜர்படுத்தப்பட்ட விஜயகுமாரை 12-ந் தேதி வரை காவலில் வைக்க திருவனந்தபுரம் சிறப்பு விஜிலென்சு கோர்ட்டு உத்தரவிட்டது. அவரது ஜாமின் மனு நாளை (31-ந் தேதி) விசாரணைக்கு வர உள்ளது என்பது குறிப்பிடத்தக்கது.