சென்னை: காற்றாலை மின்சக்தித் துறையின் முக்கிய தொழில் கண்காட்சியான Windergy India 2026 நாளை சென்னையில் தொடங்குகிறது. சென்னை வர்த்தக மையத்தில் நடைபெற உள்ள நிகழ்ச்சியை மத்திய புதிய மற்றும் புதுப்பிக்கத்தக்க எரிசக்தித் துறை அமைச்சர் பிரல்ஹாத் ஜோஷி தொடங்கி வைக்க உள்ளார்.
இந்தியாவின் காற்றாலை மின்சார உற்பத்தி திறனை மேலும் அதிகரிப்பது, புதிய தொழில்நுட்பங்களை அறிமுகப்படுத்துவது, உற்பத்தி துறையில் முதலீடுகளை ஈர்ப்பது உள்ளிட்ட அம்சங்களுக்கு இந்த நிகழ்ச்சி முக்கியத்துவம் அளிக்கிறது.
காற்றாலை உபகரணங்கள் தயாரிப்பு, தொழில்நுட்ப மேம்பாடு, மின்சார சேமிப்பு மற்றும் புதுப்பிக்கத்தக்க எரிசக்தி சார்ந்த முதலீடுகள் குறித்து தொழில்துறை நிறுவனங்கள் இதில் பங்கேற்று விவாதிக்க உள்ளன.
தமிழ்நாடு ஏற்கனவே காற்றாலை மின்சார உற்பத்தியில் முன்னணி மாநிலங்களில் ஒன்றாக இருப்பதால், சென்னையில் நடைபெறும் இந்த சர்வதேச அளவிலான தொழில் நிகழ்ச்சி தமிழகத்துக்கும் முக்கியமானதாக பார்க்கப்படுகிறது.
புதிய முதலீடுகள் மற்றும் தொழில்நுட்ப ஒத்துழைப்புகள் தொடர்பான அறிவிப்புகள் நிகழ்ச்சியில் வெளியாகலாம் என்ற எதிர்பார்ப்பும் நிலவுகிறது. காற்றாலை மின்சார உற்பத்தியை அதிகரிப்பதன் மூலம் நாட்டின் புதுப்பிக்கத்தக்க எரிசக்தி இலக்குகளை எட்டுவதற்கும் இந்த நிகழ்ச்சி உதவும் என எதிர்பார்க்கப்படுகிறது.
