பெரியகுளம்: பெரியகுளம் அருகே மேற்கு தொடர்ச்சி மலை அடிவாரத்தில் கும்பக்கரை அருவி அமைந்துள்ளது. இந்த அருவிக்கு தேனி மாவட்டம் மட்டுமின்றி தமிழகத்தின் பல்வேறு பகுதிகளில் இருந்தும் ஏராளமான சுற்றுலா பயணிகள் வந்து செல்கின்றனர். இந்த அருவிக்கு மழைக்காலங்களில் வட்டக்கானல், பாம்பர்புரம் உள்ளிட்ட பகுதிகளில் இருந்து தண்ணீர் வருகிறது.
நீர்ப்பிடிப்பு பகுதியில் பெய்த மழையால் நீர் வரத்து அதிகரித்து அருவியில் வெள்ளப்பெருக்கு ஏற்பட்டது. இதையடுத்து சுற்றுலா பயணிகளின் பாதுகாப்பு கருதி கடந்த 3-ம் தேதி அருவியில் குளிப்பதற்கு வனத்துறையினர் தடை விதித்தனர்.
இந்நிலையில் நீர்ப்பிடிப்பு பகுதியில் மழை குறைந்து அருவிக்கு தண்ணீர் வரத்து சீரானதால் அருவியில் குளிக்க தேவதானப்பட்டி வன அலுவலர் அன்பழகன் அனுமதி அளித்தார். ஆறு நாட்களுக்கு பிறகு அருவியில் குளிக்க அனுமதி வழங்கப்பட்டுள்ளதால் சுற்றுலா பயணிகள் மகிழ்ச்சி அடைந்துள்ளனர்.
