ஸ்ரீநகர்: ஏப்ரல் 22 அன்று, காஷ்மீரின் பஹல்காம் பகுதியில் நடந்த பயங்கரவாத தாக்குதலில் 26 சுற்றுலாப் பயணிகள் கொல்லப்பட்டனர். இதைத் தொடர்ந்து, முன்னெச்சரிக்கை நடவடிக்கையாக மாநிலம் முழுவதும் உள்ள சுற்றுலாத் தலங்கள் தற்காலிகமாக மூடப்பட்டன. இதன் காரணமாக, காஷ்மீருக்குச் செல்ல திட்டமிட்டிருந்தவர்கள் தங்கள் பயணங்களை ரத்து செய்தனர். இதன் காரணமாக, மாநிலத்தின் சுற்றுலாத் துறை கடுமையாக பாதிக்கப்பட்டது.
வைணவ தேவி கோயிலுக்கு ஆன்மீக யாத்திரை செல்வதும் பாதிக்கப்பட்டது. இதைத் தொடர்ந்து, சுற்றுலாத் துறையை மீட்டெடுக்கவும், சுற்றுலாப் பயணிகளிடையே நம்பிக்கையை ஏற்படுத்தவும் ஜம்மு காஷ்மீர் அரசு பல்வேறு முயற்சிகளை மேற்கொண்டு வருகிறது. குறிப்பாக, முதல்வர் உமர் அப்துல்லா கடந்த மாதம் பஹல்காம் பகுதியில் அமைச்சரவைக் கூட்டத்தை நடத்தினார். சுற்றுலாத் தலங்களையும் பார்வையிட்டார். சுற்றுலாத் தலங்களை மீண்டும் திறக்க காஷ்மீர் அமைச்சரவை அழைப்பு விடுத்திருந்தது.
இருப்பினும், இது தொடர்பான இறுதி முடிவு லெப்டினன்ட் கவர்னரிடம் உள்ளது. இந்த சூழலில், லெப்டினன்ட் கவர்னர் மனோஜ் சின்ஹா, தனது X பக்கத்தில் ஒரு பதிவில், “காஷ்மீர் மற்றும் ஜம்மு பிராந்தியத்தில் உள்ள சில சுற்றுலா தலங்களை மீண்டும் திறக்க உத்தரவிட்டுள்ளேன். பஹல்காமில் உள்ள பெடாப் பள்ளத்தாக்கு மற்றும் பூங்காக்கள், வெரினாக் கார்டன், கோகெர்னாக் கார்டன் மற்றும் அச்சபால் கார்டன் ஆகியவை நாளை திறக்கப்படும்” என்று கூறியுள்ளார்.
இதற்கிடையில், பிரதமர் நரேந்திர மோடி சமீபத்தில் கத்ரா மற்றும் ஸ்ரீநகர் இடையே வந்தே பாரத் ரயில் சேவையை தொடங்கி வைத்தார். காஷ்மீரை நாட்டின் பிற பகுதிகளுடன் இணைக்கும் இந்த ரயில் சேவை, சுற்றுலாத் துறையின் மறுமலர்ச்சிக்கு ஊக்கமளிக்கும். அடுத்த 10 நாட்களுக்கு இந்த ரயிலில் பயணிப்பதற்கான டிக்கெட்டுகள் விற்றுத் தீர்ந்துவிட்டதாக அதிகாரிகள் தெரிவித்தனர். பிரதமர் மோடி சமீபத்தில் உலகின் மிக உயரமான செனாப் ரயில் பாலத்தையும் திறந்து வைத்தார். இந்த வந்தே பாரத் ரயில் சுற்றுலாப் பயணிகள் இந்தப் பாலத்தின் மீது பயணிக்க ஒரு வாய்ப்பையும் வழங்கும்.
