சென்னையில் வறுத்த நிலக்கடலை, உரங்கள் உள்ளிட்ட பொருட்களுக்கு ஜி.எஸ்.டி. 5% ஆக குறைக்க வேண்டும் என தமிழக உணவுப்பொருள் வியாபாரிகள் சங்கம் டில்லியில் ஜி.எஸ்.டி. கவுன்சில் கூடுதல் செயலரிடம் மனு அளித்தது.
சங்க தலைவர் வேல்சங்கர், கவுரவ செயலர் சாய் சுப்ரமணியன், ஆலோசகர் ஜெயப்பிரகாசம் ஆகியோர் இந்த கோரிக்கையை வைத்துள்ளனர். மனுவில், தற்போது 12% ஜி.எஸ்.டி. விதிக்கப்படும் வறுத்த நிலக்கடலையின் வரியை 5% ஆக குறைக்க வேண்டும்.
உரங்கள், பூச்சிக்கொல்லி மருந்து, நுண்ணூட்ட உரங்களுக்கு ஒரே மாதிரியாக 5% ஜி.எஸ்.டி. விதிக்க வேண்டும். உலர் பழங்களுக்கு 12% ஜி.எஸ்.டி. இருப்பதை 5% ஆக குறைக்க வேண்டும்.
ரஸ்க், புண்ணாக்கு, வேப்பம் புண்ணாக்கு, ஈர இட்லி, தோசை மாவுக்கு 5% ஜி.எஸ்.டி. விதிப்பதை ரத்து செய்ய வேண்டும். வெண்ணெய் 12%, பிஸ்கட் 18% ஜி.எஸ்.டி. செலுத்தும் நிலையை மாற்றி இரண்டிற்கும் 5% ஜி.எஸ்.டி. விதிக்க வேண்டும். வற்றல் பொருட்களுக்கு 5% ஜி.எஸ்.டி. இருந்தால் அதை ரத்து செய்ய வேண்டும். ‘நம்கின்ஸ்’ எனப்படும் கார வகைகளுக்கு 12% இருந்ததை 5% ஆக குறைக்க வேண்டும் என தெரிவித்துள்ளனர்.
