சென்னை: அதிமுக முன்னாள் அமைச்சர் கே.ஏ. செங்கோட்டையன் மத்திய நிதியமைச்சர் நிர்மலா சீதாராமனை மீண்டும் சந்தித்தது அரசியல் வட்டாரத்தில் பரபரப்பை ஏற்படுத்தியுள்ளது. அதிமுக பொதுச்செயலாளர் பழனிசாமி, கட்சியின் மூத்த தலைவர்களுடன் கடந்த மாதம் மத்திய உள்துறை அமைச்சர் அமித்ஷாவை சந்தித்தார். இது தமிழக அரசியலில் பெரும் பரபரப்பை ஏற்படுத்தியது. டெல்லியில் திறக்கப்பட்டுள்ள அதிமுக அலுவலகத்திற்கு சென்று மக்கள் பிரச்சனைகள் குறித்து அமித்ஷாவை சந்தித்ததாக பழனிசாமி கூறியிருந்தாலும், 2026 சட்டமன்ற தேர்தல் மற்றும் கூட்டணி குறித்து ஆலோசித்ததாக தகவல் வெளியாகியுள்ளது.
பரபரப்பு அடங்குவதற்குள் அதிமுக முன்னாள் அமைச்சர் கே.ஏ. செங்கோட்டையன் ரகசியமாக டெல்லி சென்று அமித் ஷா மற்றும் நிர்மலா சீதாராமனை சந்தித்ததாக கூறப்படுகிறது. இது அதிமுக வட்டாரத்தில் மேலும் பரபரப்பை ஏற்படுத்தியது. இதுகுறித்து பழனிசாமியிடம் செய்தியாளர்கள் கேட்டதற்கு, இதுபற்றி எனக்கு எதுவும் தெரியாது என்று பதிலளித்தார். இந்நிலையில், பல்வேறு நிகழ்ச்சிகளில் பங்கேற்க சென்னை வந்துள்ள நிர்மலா சீதாராமனை நேற்று முன்தினம் கிண்டியில் உள்ள பிரபல தனியார் ஓட்டலில் செங்கோட்டையன் சந்தித்ததாக தகவல் வெளியாகியுள்ளது.
இந்த சந்திப்பின் போது தமிழக அரசியல் நிலவரம், திமுக கூட்டணியின் பலம், பலவீனம், 2026 தேர்தலில் திமுக கூட்டணியை தோற்கடிப்பதற்கான உத்திகள் குறித்து ஆலோசிக்கப்பட்டதாக கூறப்படுகிறது. பழனிசாமி அனுமதியுடன் நிர்மலா சீதாராமனை சந்திக்கிறாரா செங்கோட்டையன்? அனுமதியின்றி சந்தித்தால், அவர் மீது பழனிசாமி நடவடிக்கை எடுக்காதது ஏன்? அதிமுக உறுப்பினர்கள் குழப்பத்தில் உள்ளனர். இந்நிலையில் நாம் தமிழர் கட்சி தலைமை ஒருங்கிணைப்பாளர் சீமான் நேற்று முன்தினம் நிர்மலா சீதாராமனை சந்தித்து தமிழக அரசியல் நிலவரம் குறித்து ஆலோசித்ததாக தகவல் வெளியாகியுள்ளது.
இதற்கு சீமான் மறுப்பு தெரிவித்தார். இதுகுறித்து, சென்னையில் செய்தியாளர்களிடம் அவர் கூறியதாவது:- மத்திய நிதியமைச்சர் நிர்மலா சீதாராமனை சந்தித்திருந்தால், அவரை சந்தித்ததாக தைரியமாக கூறியிருப்பேன். அதைச் சொல்ல நான் ஏன் பயப்படுகிறேன்? நான் தயங்குகிறேனா? நான் அவர்களை சந்தித்திருந்தால், நான் அவர்களை சந்தித்தேன் என்று சொல்லியிருப்பேன். சீமான் மத்திய அமைச்சரை சந்தித்ததாக நீங்களே வம்புக்கு இழுத்தால் நான் என்ன செய்ய முடியும்?
