சென்னை: முதல் திரைப்பட வாய்ப்புக்காக காத்திருக்கும் உதவி இயக்குநர்களுக்கு திரையுலகை சேர்ந்தவர்கள் முடிந்த உதவிகளை செய்ய வேண்டும் என்று ‘மொத ராத்திரி’ படத்தின் இயக்குநர் ராஜா கருப்பசாமி வேண்டுகோள் விடுத்துள்ளார்.
அறிமுக இயக்குநர் ராஜா கருப்பசாமி இயக்கத்தில் வெளியான ‘மொத ராத்திரி’ திரைப்படம் ரசிகர்களிடையே கவனம் பெற்றது. திரையரங்க வெளியீட்டுக்குப் பிறகு ஓடிடி தளத்திலும் வெளியாகி வரவேற்பை பெற்று வருகிறது.
படத்தை விமர்சகர்கள் மற்றும் திரைப்பிரபலங்களும் பாராட்டிய நிலையில், தமிழ்த் திரைப்பட நடப்பு தயாரிப்பாளர் சங்கம் சார்பில் படத்துக்கு விருது வழங்கப்பட்டது.
விருது வழங்கும் நிகழ்ச்சியில் பேசிய இயக்குநர் ராஜா கருப்பசாமி, தனது நண்பர்கள் பலர் நல்ல கதைகளுடன் முதல் பட வாய்ப்புக்காக காத்திருப்பதாக கூறினார்.
“எனக்குத் தெரிந்து என்னுடைய நண்பர்களே 10 கதைகளை வைத்திருக்கிறார்கள். எப்படியாவது ஒரு நல்ல படம் பண்ண வேண்டும் என்று காத்திருக்கிறார்கள். என்னை விட நல்ல கதைகள் எல்லாம் வைத்திருக்கிறார்கள். முதல் பட வாய்ப்பு தேடும் அந்த உதவி இயக்குநர்களுக்கு முடிந்தால் ஏதாவது உதவி செய்யுங்கள்” என்று அவர் கோரிக்கை விடுத்தார்.
திரையுலகில் நீண்ட காலம் உதவி இயக்குநர்களாக பணியாற்றுபவர்கள், தங்களது கதைகளை திரைப்படமாக உருவாக்க வாய்ப்பு கிடைக்காமல் காத்திருக்கும் சூழலை இந்த பேச்சு வெளிப்படுத்தியுள்ளது.
