நியூயார்க்: செயற்கை நுண்ணறிவு தொழில்நுட்பம் தொடர்பாக அடுத்த 12 முதல் 18 மாதங்களில் எடுக்கப்படும் முடிவுகள், எதிர்காலத்தில் இந்தத் தொழில்நுட்பத்தின் பலன்கள் யாரை சென்றடையும் என்பதை தீர்மானிப்பதில் முக்கிய பங்கு வகிக்கும் என்று மைக்ரோசாப்ட் இணை நிறுவனர் பில் கேட்ஸ் தெரிவித்துள்ளார்.
ஏஐ தொழில்நுட்பம் இதுவரை உலகம் சந்தித்த தொழில்நுட்பங்களிலிருந்து மாறுபட்டது என்றும், அதில் மிகப்பெரிய வாய்ப்புகளுடன் சில ஆபத்துகளும் இருப்பதாகவும் அவர் குறிப்பிட்டுள்ளார்.
இந்தியாவுக்கு வாய்ப்பு
ஏஐயின் பலன்கள் பெரிய நகரங்களை மட்டுமே சென்றடையாமல் கிராமப் புறங்களுக்கும் சென்றடைய வேண்டும் என்று பில் கேட்ஸ் வலியுறுத்தியுள்ளார். இந்தியாவின் டிஜிட்டல் பொது உள்கட்டமைப்பு, ஏஐ சேவைகளை பரவலாக கொண்டு செல்வதற்கு வலுவான அடித்தளமாக இருப்பதாகவும் அவர் தெரிவித்துள்ளார்.
உள்ளூர் மொழிகளுக்கு முக்கியத்துவம்
ஆங்கிலத்தை மையமாகக் கொண்ட ஏஐ அமைப்புகளுக்கு பதிலாக, உள்ளூர் மொழிகள், உள்நாட்டு தரவுகள், பாதுகாப்பு மற்றும் நாட்டின் சொந்த திறமைகளை அடிப்படையாகக் கொண்டு தொழில்நுட்பங்கள் உருவாக்கப்பட வேண்டும் என்றும் பில் கேட்ஸ் குறிப்பிட்டுள்ளார்.
குறிப்பாக விவசாயிகள் தங்கள் சொந்த மொழியிலேயே கேள்விகளை எழுப்பி வேளாண்மை தொடர்பான ஆலோசனைகளை பெறும் ஏஐ சேவைகள் விவசாயத்தில் குறிப்பிடத்தக்க மாற்றங்களை ஏற்படுத்தக்கூடும் என்று அவர் தெரிவித்துள்ளார்.
இந்தியா போன்ற பல மொழிகள் கொண்ட நாட்டில், உள்ளூர் மொழிகளில் ஏஐ வளர்ச்சி பெறுவது தொழில்நுட்பத்தின் பயன்பாட்டை மேலும் விரிவுபடுத்தக்கூடியதாக இருக்கும் என்பதும் அவரது கருத்தாக உள்ளது.
