தெருக்களில் உள்ள ஜாதிப் பெயர்களை அகற்றும் அரசாணை மீது நடவடிக்கை இல்லை: நீதிமன்றம் உத்தரவு

மதுரை: தெருக்களில் ஜாதி பெயர்களை அகற்றுவது தொடர்பான அரசாணை மீது மேலும் நடவடிக்கை எடுக்கக்கூடாது என உயர்நீதிமன்றம் தெரிவித்துள்ளது. இந்து வழக்குரைஞர் முன்னணி மாநில துணைத் தலைவர் பரமசிவம், உயர்நீதிமன்ற மதுரை அமர்வில் தாக்கல் செய்த மனுவில் கூறியிருப்பதாவது:-

கிராமங்கள், குடியிருப்புகள், தெருக்கள், சாலைகள், நீர்நிலைகளில் உள்ள ஜாதிப் பெயர்களை அகற்ற தமிழக அரசு வழிகாட்டுதல்களை உருவாக்க வேண்டும். அரசாணை 6.10.2025 அன்று வெளியிடப்பட்டது. அதில், நவ., 19-க்குள், புதிய பெயர் சூட்டும் பணியை முடிக்க உறுதியளிக்கப்பட்டது.இந்த அரசாணையை அமல்படுத்துவதில், பல்வேறு நடைமுறை சிக்கல்கள் உள்ளன.

இதற்கு முன்பு 1978-ல் தெருக்களில் ஜாதிப் பெயர்களை மாற்றுவது தொடர்பான அரசாணை பிறப்பிக்கப்பட்டது. பின்னர் அரசாணை அமல்படுத்தப்படவில்லை. தெருக்கள், சாலைகள், நீர்நிலைகள் ஆகியவற்றில் ஜாதிப் பெயர்கள் வைப்பதில் எந்தப் பிரச்னையும் இல்லை. இந்த உத்தரவு தேவையற்றது என்பதை காட்டுகிறது. அடுத்த ஆண்டு நடைபெற உள்ள சட்டப்பேரவை தேர்தலை மனதில் வைத்து ஜாதி பெயர்களை நீக்க அரசாணை வெளியிடப்பட்டுள்ளது. மேலும், சாதிப் பெயர்களை நீக்கிய பின் பட்டியலைப் பார்த்தால், அரசின் உண்மையான நோக்கம் சாதி ஒழிப்பு அல்ல என்பது தெளிவாகும்.

தங்கள் கட்சியைச் சேர்ந்த விருப்பமுள்ளவர்களின் பெயரைச் சொல்லும் நோக்கில் அரசாணை வெளியிடப்பட்டது. இந்த அரசாணை மக்களிடையே பிரிவினையை ஏற்படுத்தும் வகையில் உள்ளது. நாட்டின் சுதந்திரத்திற்காக போராடிய தேசபக்தர்களின் பெயர்கள் மாதிரி பெயர் பட்டியலில் இடம்பெறவில்லை. எனவே, தெருக்களின் ஜாதி பெயர் மாற்ற உத்தரவை ரத்து செய்து, அதுவரை அந்த உத்தரவை அமல்படுத்த தடை விதிக்க வேண்டும். இவ்வாறு மனுவில் கூறப்பட்டிருந்தது. இந்த மனு நீதிபதிகள் அனிதா சுமந்த், குமரப்பன் அமர்வில் நேற்று விசாரணைக்கு வந்தது.

மனுதாரர் தரப்பில், “தமிழக அரசின் இந்த திடீர் பதிலால் பெரும் குழப்பம் ஏற்படும். ஆதார் அட்டை, வாகன பதிவு சான்றிதழ், பாஸ்போர்ட் உள்ளிட்ட அடையாள அட்டைகளில் பெயர் மாற்றுவதில் சிக்கல் ஏற்படும். இதை கருத்தில் கொண்டு தமிழக அரசின் உத்தரவுக்கு தடை விதிக்க வேண்டும். தெரிவிக்கப்பட்டது. அரசு தரப்பில் கூடுதல் அட்வகேட் ஜெனரல் அஜ்மல்கான் வாதிடுகையில் கூறியதாவது:-

இந்த மனு உள்நோக்கத்துடன் தாக்கல் செய்யப்பட்டுள்ளது. டெல்லி மற்றும் உத்தரபிரதேச மாநிலங்களில் தெரு பெயர்கள் மாற்றப்பட்டுள்ளன. மாநில தலைநகரங்களின் பெயர்கள் மாற்றப்பட்டுள்ளன. அப்போது வராத குழப்பம், இப்போது எப்படி வரப் போகிறது? சாதி பாகுபாடு கூடாது என்று கொள்கை ரீதியான முடிவு எடுத்து அரசாணை பிறப்பித்துள்ளது. இதை எதிர்த்து தாக்கல் செய்யப்பட்ட மனுவை தள்ளுபடி செய்ய வேண்டும். இவ்வாறு அவர் வாதிட்டார்.

பின்னர், ஜாதிப் பெயர்களை நீக்குவது தொடர்பாக மாநில அரசின் நடவடிக்கையை நீதிபதிகள் பாராட்டினர். அதேநேரம், அதற்கான நடைமுறைகள் என்னென்ன வகுக்கப்பட்டுள்ளன என்பது குறித்தும் தெளிவுபடுத்தப்படவில்லை. எனவே, அது தொடர்பாக எதிர் மனு தாக்கல் செய்ய வேண்டும். அதுவரை ஜாதிப் பெயர்களால் பிரச்னை ஏற்படும் இடங்களை ஆய்வு செய்து, ஜாதிப் பெயர் மாற்றம் குறித்து மக்களிடம் கருத்து கேட்கலாம். ஆனால், அந்த அரசாணை தொடர்பாக மேற்கொண்டு நடவடிக்கை எடுக்கக் கூடாது என உத்தரவிட்டனர்.