அன்டார்டிகா: உலகின் மிகப்பெரிய பனிப்பிரதேசமான அன்டார்டிகாவில் இயல்பை விட 20 டிகிரி செல்சியஸ் வரை அதிக வெப்பநிலை பதிவாகியுள்ளதால் பனிப்பாறைகள் வேகமாக உருகி வருவதாக ஆராய்ச்சியாளர்கள் எச்சரித்துள்ளனர். இது உலகளாவிய காலநிலை மாற்றத்தின் தீவிர அறிகுறியாக பார்க்கப்படுகிறது.
உலகின் தென் துருவத்தில் அமைந்துள்ள அன்டார்டிகா, பூமியின் மிக முக்கியமான பனிப்பிரதேசமாகும். உலகின் நன்னீரில் சுமார் 70 சதவீதம் இங்கு பனியாக சேமிக்கப்பட்டுள்ளது. பொதுவாக கோடைக்காலத்தில்கூட மைனஸ் 20 டிகிரி செல்சியஸ் வெப்பநிலையே பதிவாகும் இந்த கண்டத்தில் தற்போது அபூர்வமான வெப்ப அலை வீசி வருகிறது.
அன்டார்டிகாவின் டிரினிட்டி தீபகற்பத்தில் ஆய்வு மேற்கொண்டு வரும் சர்வதேச விஞ்ஞானிகள், இயல்பை விட 20 டிகிரி செல்சியஸ் அதிக வெப்பம் நிலவுவதாக தெரிவித்துள்ளனர். ஜூன் 6-ம் தேதி 15.4 டிகிரி செல்சியஸ் வெப்பநிலை பதிவானது விஞ்ஞானிகளை அதிர்ச்சியில் ஆழ்த்தியுள்ளது.
‘காலின்ஸ்’ பனிப்பாறை பகுதியில் ஆய்வு செய்த ஆராய்ச்சியாளர்கள், பனிப்பாறைகளின் மேற்பரப்பில் இருந்த பனிக்கட்டிகள் வேகமாக உருகுவதை நேரில் கண்டதாக தெரிவித்துள்ளனர். இந்த நிலை தொடருமானால் உலக கடல்மட்ட உயர்வு மேலும் வேகமடையக்கூடும் என எச்சரிக்கப்பட்டுள்ளது.
மேலும் உலக வெப்பமயமாதல் மற்றும் ‘எல் நினோ’ போன்ற வானிலை நிகழ்வுகள் காரணமாக, உலகின் மிக ஆபத்தான பனிப்பாறைகளில் ஒன்றாக கருதப்படும் ‘த்வைட்ஸ்’ பனிப்பாறையும் பாதிக்கப்படலாம் என்ற அச்சம் எழுந்துள்ளது.
அன்டார்டிகாவில் ஏற்படும் இந்த மாற்றங்கள், உலக நாடுகள் காலநிலை மாற்றத்தைக் கட்டுப்படுத்த அவசர நடவடிக்கை எடுக்க வேண்டிய அவசியத்தை மீண்டும் நினைவூட்டியுள்ளன.
