இஸ்லாமாபாத்: பாகிஸ்தானின் கராச்சியில் அக்டோபர் முதல் வாரத்தில் சீன நாட்டவர்கள் மீது தீவிரவாத தாக்குதல் நடத்தப்பட்டது. இதில் 2 சீனர்கள் உயிரிழந்தனர்.
10-க்கும் மேற்பட்டோர் காயமடைந்தனர். முன்னதாக கடந்த மார்ச் மாதம் பாகிஸ்தானில் சீன நாட்டவர்கள் மீது தீவிரவாத தாக்குதல் நடத்தப்பட்டது. 60 பில்லியன் டாலர் செலவில் சீனா-பாகிஸ்தான் பொருளாதார வழித்தட திட்டம் பாகிஸ்தானில் நடந்து வருகிறது.
இதற்காக சீன நாட்டவர்கள் பாகிஸ்தானில் தங்கி பணியாற்றி வருகின்றனர். இந்தத் தாக்குதல்கள் குறித்து, பாகிஸ்தானில் கடந்த செவ்வாய்க்கிழமை நடைபெற்ற நிகழ்ச்சியில் பங்கேற்ற பாகிஸ்தானுக்கான சீன தூதர் ஜியாங் ஜெய்டாங், “கடந்த 6 மாதங்களில் மட்டும் பாகிஸ்தானில் சீன நாட்டவர்கள் மீது இரண்டு தாக்குதல்கள் நடந்துள்ளன. இதை ஏற்க முடியாது. சீனாவுக்கு எதிரான பயங்கரவாத நடவடிக்கைகளை பாகிஸ்தான் அரசு முற்றிலும் தடுக்க வேண்டும்.
சீனா-பாகிஸ்தான் பொருளாதார வழித்தடத் திட்டத்தை சீனர்கள் தொடர பாதுகாப்பான சூழலை பாகிஸ்தான் அரசு உருவாக்குவது அவசியம். சீன அதிபர் ஜி ஜின்பிங் தனது நாட்டு மக்களின் பாதுகாப்பிற்கு முக்கியத்துவம் அளித்து வருகிறார். குறிப்பாக, பாகிஸ்தானில் உள்ள சீனர்களின் பாதுகாப்பு குறித்து அவர் மிகுந்த அக்கறை கொண்டுள்ளார். அதனால் தான், பாகிஸ்தான் தலைவர்களை சந்திக்கும் ஒவ்வொரு முறையும், அங்குள்ள சீனர்களின் பாதுகாப்பை உறுதி செய்ய வேண்டும் என வலியுறுத்துகிறார்,” என்றார்.
இதற்கு கடந்த வியாழக்கிழமை பதிலளித்த பாகிஸ்தான் வெளியுறவுத் துறை செய்தித் தொடர்பாளர் மும்தாஜ் ஜகாரா பலோச், “சீனாவுக்கும் பாகிஸ்தானுக்கும் இடையே நல்லுறவு நிலவும் சூழலில், சீனத் தூதரின் கருத்து குழப்பத்தை ஏற்படுத்துகிறது. இருப்பினும், சீன நாட்டினரின் பாதுகாப்பை பாகிஸ்தான் அரசு உறுதி செய்கிறது என்றார்.
