‘முருகா’ அசோக்குமார், அஜய், சோனியா, மாறன் மற்றும் பலர் நடித்துள்ள படம் ‘சதுரங்க ஆட்டம் ஆரம்பம்’. இந்தப் படத்திற்கு டேனியல் ஜே வில்லியம்ஸ் ஒளிப்பதிவு செய்கிறார், பாலசுப்ரமணியம் இசையமைக்கிறார். எம்.வி. ராமச்சந்திரன் இயக்குகிறார். வி.வி.எஸ். சுப்ரீம் பிலிம்ஸ் சார்பில் வினோத் வி ஷர்மா தயாரிக்கும் இந்தப் படத்தின் தொடக்க விழா சென்னையில் நடைபெற்றது.
இயக்குநர் பேரரசு, இயக்குநரும், நடிகருமான ஆர்.அரவிந்தராஜ், நடிகர் சக்திகுமார், இயக்குநர் பாரதி கணேஷ் உள்ளிட்ட பலர் கலந்து கொண்டனர். இயக்குநர் பேரரசு பேசும்போது, ‘இன்று நான்கைந்து ஹீரோக்களுக்குத்தான் ஓப்பனிங். மற்றபடி எவ்வளவு பெரிய பட்ஜெட்டில் படம் எடுக்கப்பட்டாலும் மக்களுக்குப் பிடித்தால்தான் வெற்றியடையும். என்னுடைய முதல் படத்திலேயே நடிகர் விஜய்யிடம் கதை சொன்னபோது மூன்றாவது தடவை தான் ஓகே சொல்லிவிட்டார்.
அப்போதுதான் எனக்கு பயம் வந்தது. நான் ஒரு அறிமுக இயக்குனர். அவர் ஒரு மாஸ் ஹீரோ. கதையை நம்பி எங்களிடம் படத்தை ஒப்படைத்துவிட்டாரோ என்று பயந்தேன். படம் முடிஞ்சதும் விஜய் சார் பார்த்துட்டு கதை சொன்னதை விட 3 மடங்கு நல்லா பண்ணியிருக்கேன் என்றார். அப்போதுதான் திருப்தியாக உணர்ந்தேன். முன்னதாக, மக்கள் விமர்சனங்களைப் படித்துவிட்டு படத்திற்குச் சென்றனர். இப்போது மக்களே விமர்சகர்களாக மாறிவிட்டனர். மக்களுக்கு பயந்து படம் எடுக்க வேண்டும்,” என்றார்.
