தமிழக அரசியல் களத்தில் ஆளும் தவெக அரசுக்கும் தி.மு.க.வுக்கும் இடையிலான மோதல் தீவிரமடைந்துள்ளது. முதலமைச்சர் விஜய் தலைமையிலான அரசின் செயல்பாடுகளை விமர்சித்துள்ள தி.மு.க. தலைவர் மு.க.ஸ்டாலின், தமிழகத்தில் அரசியல் மாற்றத்துக்கான சூழல் உருவாகி வருவதாகக் கட்சி நிர்வாகிகளிடம் தெரிவித்துள்ளார். அவரது பேச்சு அரசியல் வட்டாரங்களில் பரபரப்பை ஏற்படுத்தியுள்ளது.
சென்னையில் முன்னாள் அமைச்சர் கே.என்.நேருவின் குடும்பத் திருமண நிகழ்ச்சியில் கலந்து கொண்டு பேசிய ஸ்டாலின், கட்சியினர் எதிர்கால அரசியல் மாற்றத்துக்குத் தயாராக இருக்க வேண்டும் எனக் கேட்டுக்கொண்டார். மாநிலத்தில் சட்டம் ஒழுங்கு நிலைமை குறித்து பல்வேறு கேள்விகள் எழுந்துள்ளதாகவும் அவர் குறிப்பிட்டுள்ளார்.
கள்ளக்குறிச்சி தொகுதி தவெக சட்டமன்ற உறுப்பினர் அருள் விக்னேஷ் மீது மாவட்ட ஆட்சியருக்கு ஆபாசமான வாட்ஸ்அப் தகவல்கள் அனுப்பியதாக எழுந்துள்ள குற்றச்சாட்டை ஸ்டாலின் முன்வைத்தார். இந்த விவகாரத்தில் முதலமைச்சர் விஜய் மவுனம் காப்பதாகவும் அவர் விமர்சித்தார். கனிமொழி இந்த விவகாரத்தைப் பொதுவெளிக்குக் கொண்டு வந்ததாகவும் குறிப்பிட்டார்.
மேலும் ஆளும் கட்சியைச் சேர்ந்த சில நிர்வாகிகள் மீது பாலியல் குற்றச்சாட்டுகள் எழுந்துள்ளதாகவும், சட்டம் ஒழுங்கு தொடர்பாக அரசு உரிய நடவடிக்கை எடுக்க வேண்டும் என்றும் அவர் வலியுறுத்தினார். சினிமாவில் கதாநாயகனாக நடித்தவர் நிஜ வாழ்க்கையில் வில்லனாக மாறிவிட்டதாக விஜய்யை நேரடியாக விமர்சித்த ஸ்டாலினின் பேச்சு தமிழக அரசியலில் புதிய விவாதத்தை உருவாக்கியுள்ளது.
