தமிழகத்தில் தீபாவளி கொண்டாட்டத்தின்போது பட்டாசு மற்றும் பிற விபத்துகளால் அவசர மருத்துவ உதவி தேவைப்பட்டவர்களின் எண்ணிக்கை அதிகரித்துள்ளது. நவம்பர் 7ஆம் தேதி காலை முதல் நவம்பர் 9ஆம் தேதி காலை வரை 48 மணி நேரத்தில் 108 ஆம்புலன்ஸ் சேவைக்கு 39,634 அழைப்புகள் வந்துள்ளதாகச் சுகாதாரத் துறை தகவல்கள் தெரிவிக்கின்றன.
இந்த அழைப்புகளின் அடிப்படையில் 1,283 ஆம்புலன்ஸ்கள் பணியில் ஈடுபடுத்தப்பட்டன. காயம் மற்றும் விபத்துகள் தொடர்பாக 6,317 அழைப்புகளும், தாக்குதல் சம்பவங்களால் ஏற்பட்ட காயங்கள் தொடர்பாக 1,627 அழைப்புகளும், தீக்காயங்கள் தொடர்பாக 462 அழைப்புகளும் பதிவாகியுள்ளன.
இந்தக் காலகட்டத்தில் அரசு மருத்துவமனைகளில் 4,098 பேர் உள்நோயாளிகளாக அனுமதிக்கப்பட்டுள்ளனர். அவர்களில் 430 பேர் தீக்காயங்களுக்காகச் சிகிச்சை பெற்றுள்ளனர். மேலும் 1,322 பேர் தீக்காயங்களுக்காகப் புறநோயாளிகளாகச் சிகிச்சை பெற்றுள்ளனர். தீக்காயங்களால் தமிழகத்தில் இருவர் உயிரிழந்ததாகவும் தகவல் வெளியாகியுள்ளது.
பட்டாசுகளை வெடிக்கும்போது குழந்தைகளைத் தனியாக அனுமதிக்கக் கூடாது. எளிதில் தீப்பற்றக்கூடிய பொருட்கள் அருகில் பட்டாசு வெடிப்பதைத் தவிர்க்க வேண்டும். தீக்காயம் ஏற்பட்டால் உடனடியாக மருத்துவ உதவி பெறுவதுடன், காயத்தின் மீது தவறான மருந்துகள் அல்லது பொருட்களைப் பூசாமல் இருப்பதும் அவசியம்.
